Inrinni zanah Real Madrid, PSG leh Bayern Munich chak zo loin, AC Milan erawh Lazio mualah sikhat faiin an chak hram
- Valencia 2-2 Real Madrid
La Liga hmahruaitu Real zinchhuak hian sihnih an phurh hnuah Vinicius Junior goal hnih tihluh hmangin Valencia khelmualah point khat an thawkchhuak hram a, table-ah hma an la hruai chhunzawm zel.
Mestalla khelmualah hian minute 27-ah Hugo Duro chuan mualneitu team hmahruaina goal khungin, season kal laia a goal 12-na a ni tawh.
Minute thum a liam leh rualin Roman Yaremchuk chuan sihnih faia Valencia hmahruaina a thun ve leh a, Real an hawihai!
Chawlhlawk hma chiahin Vinicius Junior chuan mikhual siphurh pakhat zawk sut thenin, second half laihawlah Brazilian bawk hian a team tlawm tur chhanin a goal hnihna a tilut zui leh.
Mestalla khelmual kha season liamta May thlaa a vun rawng avanga Real mihang player Vinicius Jr an auhnawmnahna hmun leh hnawhchhuah a tawh zuina khelmual niin, kuminah chuan khati ang kha a tawk ta chiah lo a, amah diriamtute chu goal hnihin a chhanglet ta zawk a ni.
Hun tawp hamrik rik ruala referee laka complaint a duhthawh deuh avangin La Liga season kal laia goal 16 ngah tawh Jude Bellingham chu hnawhchhuah a ni.
He draw hnu hian an game hnuhnung vawi 21-ah Real
Madrid-in tlawm an pumpelh tling ta a ni.
- PSG 0-0 Monaco
Zirtawpni khan Monaco khelmual Stade Louis II-ah Ligue 1 hmahruaitu Paris St Germain chuan goal an khung zo lo a, ball chang tam zaqwk mah se AS Monaco lamin an lama goal lut tur an hum tluan theih avangin Luis Enrique team-in point hnih an hloh then a, league-ah game 19 chhung an tlawm lo zawn tling thung.
PSG hian point 55 neiin, anmahni hnaihbertu Brest lakah piont 12-in hma an hruaifal a, nizan result tarlan hman lohah Brest hian an mikhual Le Havre laka point thum an hmuhchhuah theih chuan a ler pahnih luahtu team inthlauhna hi a tawi hlek ang.
Half-time laiin forward Kylian Mbappe lakchhuah ni mah se second half-ah hlauhawm zawkin PSG an inlan a, goal erawh an thun thei ta chuang lo a ni.
PSG hian Thawhlehni Champions League last-16 second leg-ah Real Sociedad an luhkhung zui leh ang.
- Bayern Munich 2-2 Freiburg
Hun tawp dawnah si chhuahin Bavarians-in an kawtkaiah point hnih an hloh then a, Bundesliga title beiseina a tlahniam leh sauh.
German champion ni zan rei tawh Bayern hian league khelh 24-ah point 54 humin pahnihna la luah zui bawk mah se hmahruaitu Bayer 04 Leverkusen-in nizan result tarlan hman loha mualneitu 1. FC Koln an hneh chuan Bayern lakah hian point 10 zetin hma an hruaifal thei tawh dawn a ni.
Serie A lamah forward Noah Okafor goal khat thun hmangin AC Milan chuan Zirtawpni khan Lazio mualah 1-0 hnehna an chang ve bawk .