Aizawl : Thenzawl khawtlangin infiammi, naupang leh thalaite tan Thenzawl-ah Sports stadium/football stadium puitling siamsak turin Mizoram sorkar an ngen.
March 1, 2024 zan khan Thenzawl Zome Football Association (TZFA) bultumin Vantawng Group YMA Run, Thenzawl Bazar Vengah Thenzawl khawchhunga Village Council, political party hrang hrang, NGO (Vantawng Group YMA, Thenzawl Joint YMA, Area MUP leh Joint MHIP) aiawh te chuan Joint Meeting neiin, Mizoram sorkarin Thenzawl ah sports/football stadium puitling siamsak tura an ngen thu an rel.
Thenzawl khawtlang huap inrawnkhawmna hi TZFA President Liantluanga Renthlei chuan kaihruaiin, Thenzawla Sports/Football Stadium Mizoram sorkarin dah tura an ngenna a hlawhtlin theih nan lungrual taka hmalak ni se, a hmun atan AH&Vety department ram, Thenzawl Venghlun chu sorkarah ngen ni se an ti a. An ngenna hi bialtu MLA, Chief Minister Lalduhoma leh Sports Minister Lalnghinglova Hmar bakah sorkar mi pawimawh te pek vek an rel a, a tul anga lo bawhzui zel turin TZFA an ruat nghal bawk.