March 2, Inrinni zan khan MSL 9 semi-final thawhkhatna khelh a ni a, MSL 9-ah tlawm la nei lo Zarkawt BCA in an khingpui Champhai Basketball an hneh.
League round-ah hneh loh nei lo Zarkawt BCA hian Champhai lakah bul an tan tha a, quarter hmasa pahnihah chungnung zawkah an tang ve ve. Quarter hnuhnung pahnihah hnufual zawk ni zawn bawk mah se chawlhlawk hmaa an hmahruaina an chakpui tho thung. BCA hi quarter hmasa berah point 15 ngawtin an chungnung a, bul an tan tha hle. Quarter hnihnaah point 8 in an chungnung zui leh a, point 23 a hmahruai chungin chawlhlawk an hmang.
Chawlhlawk hnu lamah champhai an khel tha hret a, quarter thumnaah point 14 ngawtin an chungnung a, an inkar an tizim. Quarter hnuhnung berah inlehthalna lian thlentir tum viau mah se point khat chauhin an chungnung a, point 8 in an khingpuite an umphak ta lo va. Inkhel hmuhnawm takah Zarkawt BCA chu point 93-85 in an chak zui ta a ni.
Champhai an hneh tum hian Zarkawt BCA tan Lalnunpuia Renthlei chu point thawkchhuak hnem ber a ni a, point 25 a thawkchhuak. BCA tan hian Emmanuel Malou chuan point 24 a thawkchhuak ve bawk. Semi-final thawhkhatnaah Champhai chakpui zo lo mah se Tevis Ryan Robinson Jr. chu point thawkchhuak hnem ber a ni a, point 32 lai a thawkchhuak.
Semi-final hi vawi thum khelh tur a ni a, BCA leh Champhai hi March ni 5, Thawhleh zan leh March ni 7, Ningani zanah an inhmachhawn zui leh ang. MSL 9 semi-final hi zanin dar 8:00-ah khelh chhunzawm a ni dawn a, champion lai Khatla TBL leh Bungkawn LB Associates an inhmachhawn ang.