Bundesliga kawtkaia Bayern Munich lal hrawtna thiat turin Bayer Leverkusen chuan hmalam an pan zel a, Pathianni zanah sihnih faia mualneitu Cologne hneh lehin, league table-ah point 10 zetin anmahni hnaihbertu Bayern nena an inkar an pawt hla ta a, title an hnaih zel.
Karliamta Zirtawpni khan defending champion Bayern Munich chuan 2-2-in Freiburg an inhnehtawkpui a, Xabi Alonso team Leverkusen dinhmun a tha sawt.
Pathianni inkhelah Granit Xhaka laka a foul avangin Cologne player Jan Thielmann chu minute 14-na lekah straight red card hmanga hnawhchhuah niin, chu chuan hmahruaitu team dinhmun a titha a; first half minute 37-a Jeremie Frimpong goal leh second half minute 73-a Alex Grimaldo-te goal hmangin an mikhualnaah point thum an thawkchhuak.
Leverkusen hi tun season inelna hrang hrangah belhkhawmin game 34 chhung an tlawm lo tling ta a, league khelh 24-ah point 64 nei tawhin, an hnuai chiaha pahnihna luahtu Bayern chuan point 54 an hum ve tawh bawk.
Rhein derby-a Bayer Leverkusen goal hnihna khungtu Grimaldo khan season kal laiah league goal kua a thun tling a, sikhat an phurh hnua huaisen taka beilet Cologne beiseina titawptu a ni.
Leverkusen hian an club chanchina an league title hmasaber tur an hnaih zel a, Rhine luipui kana an thenawm Cologne khelmuala point thum an hlawhchhuak leh thei hi Alonso tan thawk huaina tham a tling awm e.
Bundesliga title hnuhnung 11 tehreng changtu Bayern tukdawl an tumna kawnga an tlo em avangin Leverkusen hi hminglemah ‘Neverkusen’ tiin an sawi der tawh a, tuna an khelh dan en hi chuan league title an tan a hmin thei nge nge dawn niin a lang!