Pathianni zan khan Etihad Stadium-ah Manchester Derby khelh a ni a, inkhel hmuhnawm takah mual neitu City in an mikhual United an lehthal. Pathianni zana inkhel dangah AFC Bournemouth in Mimualah hnehna an chang ve bawk.
Inkhel ngaihven hlawh takah Etihad Stadium-a lenglut Manchester United in bul an tan tha viau a, an hun tha neih hmasa ber an chhawr tangkai nghal. Inkhel tan atanga minute riatna lekah United hian fuh zetin City an nawr tlang a, Bruno Fernandes ball pek tha tak chu Marcus Rashford chuan turu zetin a pet goal a, pui takin hmahruaina goal a thun. City lehah Rashford-a’n goal a thun emaw, assist emaw a neihin United an chak thei viau a, an elpui lian lakah hnehna chan ngei beiseiin an phur hle. Chak mamawh United hian hun rei tak chhung an goal venghim thei bawk mah se chawlhlawk hnu lamah goal thun ngawt an chhuah ta thung.
City hian an si phurh sut ngei tumin tan an khawh a, an khel tha zui hle. Ball an chang tam a, an khingpuite an nawr bet tlat a ni ber mai. Ball chang tam viau mah se United tlarhnung inrem phui tak an paltlang hlei thei lova, an goal thun theihna hun tha an hlah tel bawk. An beh reng lai hian tha zetin United in an nawr tlang a, goal hmahruai thuntu Rashford chuan goal thun theihna hun tha a neih chu ho lamah a chantir.
Chawlhlawk hma ngeiin City in an si phurh sut an tum a, hun tha pawh an nei. Khel tha tak Phil Foden chuan Haaland a pek loh vangin an chance hlu an hlah a. Haaland hian tibuai nei lo mah se goal line bul lawk atangin a pet over ringawt bawk a, mak takin a hun tha neih a hlah tehtlat bawk. Chawlhlawk hmain United an him tluan hram a, si khat faia hmahruai chungin chawlhlawk an hmang.
Chawlhlawk hnu lamah City an khel tha lehzual a, United tan chelh rual an ni ta lo. Mawi taka ball inpe kual a, an mikhualte an kat kual reng hnuin City in goal an thun ta nge nge. Phil Foden chuan fuh taka a khalh kual hnuin box pawn atangin mawi zetin a pet kual lut a, minute 56-naah goal thunin an si phurh a sut. Foden goal thun hian City a fuih phurh viau laiin United an hnual ve ngawih ngawih thung.
Foden goal thun vanga phur tak City hian an khel tha zui hle a, an khingpuite an nawr bet tlat. Goal thun belh thei mai lo mah se hun tawp dawnah che fuhin, goal an thun belh ta nge nge. Fuh taka ball an inpek kual hnuin Foden chuan tha takin a khalh lut a, si nghak Andre Onana dan rual lohin lei hrulah a pet goa a, minute 80-naah hma an hruai letna goal a thun. Foden goal hnihna hian United a phum fel a ni ber a, penalty an beisei thlawn leh zel vangin thochhuak tur an awm tawh lo.
United an hnual a, an buai zui lai City in an nawr zui chiam a, goal an thun belh leh. United midfielder Amrabat chetsual vangin City hian hun remchang an hmu a. Tibuaitu nei lo Erling Haaland chuan minute 90+1-naah an goal thumna a thun a, an chakna a nem nghet. Haaland goal thun hnu hian goal dang a luh belh tawh lova, City in an hmelma lian Manchester United chu 3-2 in an hneh let a, point thum hlu tak an hmu.
An mualah an chak vangin City hian hmahruaitu Liverpool nen an inkar an tizim a, champion nawn beiseina an chawk nung thar leh. City in hma lam an pan laiin United in top 4 huang luah phak an beiseina an chuai hret hret thung.
Pathianni zana inkhel dangah Turf Moor-a lenglut AFC Bournemouth chuan mualneitu Burnley chu Justin Kluivert leh Antoine Semenyo te goal thun hmangin an hneh.