Indian football chhungkaw boruak buaina chuan zual lam a pan zel a, karliamta Inrinni khan All India Football Federation (AIFF) principal legal advisor Nilanjan Bhattacharjee chuan corruption-a inhnamhnawihah president Kalyan Chaubey puhin, Chaubey hian an puhna chu behchhan awm lo tia phain, dan hmanga a khinlet ngei tur thu a sawi ve thung.
Prime Minister Narendra Modi hnena ziaka thil awmdan a thlenah Bhattacharjee chuan chhe takin Chaubey a puh a, langtlang lo zeta ‘tender’ kalpuiah leh a duhsak zawngte thlangah a puh.
Bhattacharjee hian Chaubey chu federation sum khawihchingpen leh AIFF fund-te chu a mimal suma pawtpengah a puh bawk!
Prime minister hnena zualkona lehkha a thehluhah AIFF principal legal advisor chuan season liamta I-League TV leh media hrang hranga phochhuahna tender koh leh a hmutu tur thlan kawngah Chaubey chu dik lo taka thil kalpuiah puhin, I-League mai bakah IWL leh Santosh Trophy lam thlengin corruption a kalpui niin a ziak a; futsal leh tournament dang dangah pawh broadcasting service provider thlan danah a mimal hlawkna tur zawngin chet a thawh tih a sawi a, a lehkha copy chu Home Minister Amit Shah leh Sports Minister Anurag Thakur a thawn tel bawk.
Bhattacharjee chuan, “Vaibelchhe tam tak chu tuna president hna chelh mektu hian a mimal zinna senso atan leh hotel thlenna man atan a hmang a; a Bangalore vawikhat zinna manah ringawt pawh business class-a teivahna, tualchhunga a sum dehral leh hotel thlenna manah cheng nuai 40 chuang a hmang,” tiin a puh.
Chaubey thung chuan a laka puhna zawng zawng chu phain, belhchian dawl lo leh nghahchhan nei lo niin a sawi a, dan hmanga a khinlet ngei tur thu a sawi ve thung.
Bhattacharjee chuan September 2022-a AIFF president hna Chaubey-a’n a chelh hnu khan tuna a hna thawk tura lakluh a nih thu sawiin, tunhnaiah a hna vawn lai chu pawhseisak a nih thu tarlangin, “Ka term hmasa chu nikum October thla khan a tawp a, chumi hnuah kum khat atan ka term chu pawhsei niin, he thu ka sawichhuah avang hian min ban dawn mah se pawi ka ti lo,” a ti.
Bhattacharjee hian a hma pawhin AIFF chu thla hnih lai nikum lam khan a hlawh tur pe duh loah a lo puh tawh a, a hnuah an pe leh tih a tarlang tel.