Hun pangngai tawp hma minute hnih chiah awm tawha Giacomo Raspadori goal thun hmangin Napoli chuan an mikhual Juventus lakah 2-1 hnehna changin, Naples khaw team game nga an tlawm lo zawn ta a, Serie A table-ah pasarihna luah chhoin, Juve erawh pahnihnaah an la ding a, an aia game khata khel tlem leh hmahruaitu ni bawk Inter Milan lakah point 12 ngawtin an hniam tawh a, nizan result tarlan hman lohah Inter hian an mikhual Genoa laka point thum an hmuh leh theih chuan Turin khaw club nena an inkar hi an pawthla leh sawt ang.
Pathianni zan inkhelah Napoli hian chawlhlawk dawnah Khvicha Kvaratskhelia goal hmangin hma an hruai a, half time-ah sikhat faiin hma an hruai phawt.
He goal khat hi mualneitu team-in chakpui thei mai dawna an lan hnu minute 81-ah an hmahruaina an hloh a, Juve siphurh suttu hi Federico Chiesa niin, Alcaraz siamsak a ni.
Minute 88-ah Victor Osimhen chuan Napoli hmahruai nawnna ni thei turin penalty a pet a, Juve Polish goalkeeper Wojciech Szczesny chuan dansak mah se ball letleh chu Raspadori chuan goal-ah chantirin mualneitu team chakna goal a ni zui ta a ni.
Damdawi hman phal loh a hmang tih nemngheh a nih hnuin Juventus player langsar Paul Pogba chu kum li chhung atan hrem a ni a, French player hremna puan a nih hnua Juve chetchhuah vawikhatnaah an tlawm zui ta a ni.
Napoli manager Francesco Calzona chuan Walter Mazzarri a thlak hnuah a team thar chu game li khelhpuiin tlawm a la pumpelh fai vek a, tun kha an home ground Diego Armando Maradona Stadium bika a team a chakpui vawikhatna a ni.
Serie A champion Napoli hian season hmasa an pha lo hle a, Pathiannia an chak leh nen Fiorentina hmakhalhin pasarihna an luah chho a, parukna Atalanta chu point thuma pha loin, season thara European competition khel pha turin an la tan deuh chu a ngai dawn.
Pathianni zan inkhel dangah Atalanta hi an mikhual Bologna lakah 2-1-in an tlawm a, Champions League hmun inchuhna kal mekah an kechheh a bahlah leh rih.