Aizawl : Lai Autonomous District Council (LADC)-a MNF sorkar, Chief Executive Member V. Zirsanga kaihhruai chu thlawptu a neih dan tunkar Ningani-ah fiah a ni dawn.
LADC-a V. Zirsanga kaihhruai MNF Legislature Party chuan thlawptu a nei ngah tawk tawhlo tih tunhnai khan MDC 13 ten hming ziakhnanin Governor hnenah an thlen a. He thu kal zelah hian nimin khan Lai Autonomous District Council Chairman chuan Ningani, ni 7, chawhma dar 10:30 ah Special Session a kova , Governor-in Floor test nei tura a tih angin Special Session hi koh a ni.
LADC, MNF Legislature Party-a member 9 leh anmahni thlawptu BJP, INC, ZPM leh Independent MDC pakhat theuh, an vaiin MDC 13 te chuan CEM V. Zirsanga chu thlawptu a nei ngah tawk lo niin Governor-ah thlenin, he thu kalzelah hian Governor chuan V. Zirsanga dinhmun fiah turin floor test neih tura a rawn angin LADC Chairman V.L. Hmuaka chuan LADC Special Session chu a ko ta a ni.
LADC CEM V. Zirsanga chuan LADC ah MNF Legislature Party ten sorkar tha tak an din zui theih nan a dinhmun atanga inhnuhhniama, eng chanvomah chelh loh a hreh loh thu sawiin, MNF MDC te chu inlamlet turin a lo sawm tawh a. Chanchin buatsaih lai thleng hi chuan thu thar dang a la awm lo a ni.