Asean thenawm ramte’n an thikrawn karah Singapore-in Taylor Swift a mikhual mek a, sum an sihhmuh erawh ramdangte rin ang he hu a ni lo niin, sorkar-in a tarlang.
Mipui nuai thum chuang punkhawmna tura show paruk hi ticket sold out vek tawh niin, The Eras Tour pui lutuk tak mai dawngsawng tura remchanna hmu ve lo thenawm ram te vuivaina leh lungawi lohna pawh a riring zel.
Thailand prime minister hian Taylor Swift-i’n thenawm ram te show a neih ve theih lohna turin sum tam tham tak an pe ni awm sawi pawh a ri hat hat mek bawk.
Heti anga puhna leh beihna hi Singapore sorkar chuan a hnawl thung a, Culture minister Edwin Tong-a’n, “Sum an sawi zat hi online lamah inrinsiakna a tam hle a, ka sawi theih erawh chu tuna a zat an sawi hi a dik lova, nasa takin a pha lo bawk,” a ti.
Sumdawnna thilah an inremna angin a zat chiah sawi a rem lo thung, a ti bawk.