Karnataka state sorkara tangduna sorkarna chelh mek, Congress leh Janata Dal (Secular) chuan Lok Sabha inthlanpui lo awm turah thawhho zui tumin indawr mah se an la inbe rem thei rih lo zel.
Party pahnih hruaitute hi Thawhtanni pawh khan an indawr leh a; mahse, bial insem dan turah an la lungawi tawk thei lo ve ve a, thawhhona thuthlung an la siam thei lo.
Congress atangin an president Rahul Gandhi chuan JD(S) hruaitu, HD Deve Gowda chu la dawr chhunzawm leh a tum a ni.
Tun tum hi party pahnihte tum li an indawrna a ni tawh a, engmah tihfel theih an la nei lo zel rih a ni.
JD(S) hian bial 28 awmah bial 12 chuh an duh a, heng zingah hian Congress-in an chan mek, Tumakuru leh Chikkaballapur bial a tel a. Congress hian bial ruk chauh pek an tum thung a. Hei bakah hian JD(S)-in 2:1 ratio-a bial insem an rawt pawh an duh lo bawk.