Aizawl: Transport Minister Vanlalhlana’n lirthei intlanchhawk avangin lirthei a pun chak phah em tih chungchangah zirchianna an la nei ngai lo a, he ruahmanna tidanglamthei tu chu Co-ordination Committee on Traffic Management a nih thu house a hrilh.
Nimin assembly session-a zawhna leh chhanna hunah member-te zawhna chhangin Transport Minister Vanlalhlana chuan lirthei intlanchhawk hman hma, kum ruk chhunga lirthei pun dan chu 60,416 a nih thu leh intlan chhawk hnu kum ruk chhunga a pun dan chu 1,26,697 niin a sawi.
Lirthei intlanchhawk chu Aizawl Municipal Corporation area-ah chauh hman a ni tih te, Aizawl chu Mizoram khawpui ber a nih angin Aizawl lirthei chauh pawh ni lo, Mizoram hmun hrang hrang atangin lirthei lut leh chhuak, a inpawlh sawp nasa em em tih te, hei vang hian intlanchhawk avanga ni tina lirthei ding zat chu sawi mai theih a ni lo tih a sawi a, lirthei intlanchhawkin sum leh pai a nghawng dan chu transport department atang chuan zirchianna a la awm lo a, tun dinhmunah zir chiangtu tur pawh ruat a la ni lo niin a sawi.
Transport minister chuan Aizawla lirthei intlanchhawk chu transport department chan ni loin Coordination Committee on Traffic Management (CCoTM) kut a ni a, tihdanglam a duh chuan a ti danglam theitu an ni tih a sawi a, district thar pathumah DTO office hawn tumin department-in hma a la a, DP&AR leh finance department-in phalna a pe tawh a, thawktu tur lak hunah DTO office hawn tum a nih thu a sawi bawk a ni.