India-a court chuan pianphunga rualbanlo, mi thiam tak pakhat leh mi dang pali chu Maoist helte nen inzawmna an nei nia hriat an nih avanga dam chhung tang tura hremna chu hnawlin a chhuah.
GN Saibaba-a hi a kawng achin hnuai lam che thei lo a ni a, kum 2017 khan an state-a hel awm tihtawp tuma beihpui thlak a nih laiin thiam loh chantir a ni.
An puhna hrang hrangte chu a pha vek thung.
Maharashtra-a court chuan kum 2022 khan thiam a chantir tawh a; India-a court sang ber chuan hnawlin a chungchang ngaihtuah that leh turin a ti.
Thawhlehni khan Bombay High Court hnuaia Nagpur bench chuan Saibaba-a leh mi dangte hi thiam a chantir leh ta a, dam chhung tang tura tihna pawh a hnawl vek a ni.
Delhi University-a professor thin, Saibaba-a hi a vawi khat nan kum 2014 khan dan pawna dah, Communist Party of India (Maoist) member nia puh a nih avangin man a ni.
Maoist helho hian communist rorelna a awm theih nan leh tribal leh thingtlang mi retheite dikna atan an bei niin an insawi.
Saibaba-a hi tribal chenna hmunah zinin India sipaite leh Maoist dodaltute chet lak dan dik lohzia mipui hnenah sawiin hriat a hlawh hle thin a ni.
Maoist tan zawng hian tawng chhuak thin mah se Communist Party of India (Maoist) member erawh a ni lo hrim hrim niin a insawi.
Court chuan kum 2017 khan ‘pawikhawih turin mi a phiar a, ram lakah indona a thlen’ nia sawiin thiam loh a chantir a ni.
Thutlukna a siamah judge chuan ‘pianphungah rual ban lo mah se rilru lamah erawh a fit’ tiin a sawi a, ‘dam chhung lung in tan mai pawh hi a phu zo lo a ni’ ti hialin a sawi.
Kum 2022 khan Bombay High Court chuan an puhnaah hian thiam a chantir ve thung a; mahse, Maharashtra sorkar chuan Supreme Court-ah khing letin thiam chantirna chu a tikhawtlai leh ta rih a ni.
Court hian Saibaba-a hi ‘thubuai rip tak’ nei a ni a, ‘ram himna leh inpumkhatna tiderthawng thei thil thubuai’ a nih thu a sawi a. Hetiang thubuai hi high court-a ngaihtuah chi a nih loh thu a sawi.
Activist leh mihring dikna chanvo humhalhtu pawlte chuan nawrhlirha thu reng man a ni chu an sawisel a, a dik lo niin an sawi.
United Nations Special Rapporteur Mary Lawlor chuan hremna pek chu ‘a mihrin lohthlak a, ngaihtuahna fim lo thil tih’ a nih thu a sawi bawk.