Aizawl: MZP General Headquarters, Aizawl buatsaihin nimin chawhnu dar 1 khan ‘Zoram Ni’ hman niin, Home Minister K Sapdanga’n a hmanpui.
Kum 1966 March 5-a bomb hmanga Mizoram beih a nih champhaphak, ‘Zoram Ni; puala hun hman hi School Education Conference Hall, Treasury Square-ah buatsaih a ni a. Khuallian Home Minister K Sapdanga chuan Mizo hnamin a tawrhna hi theihnghilh chi a nih loh thu leh MZP-in a tha zawnga kum tin a hmang chu lawmawm a tih thu a sawi.
K Sapdanga chuan, “Jet fighter hmanga Mizoram beih champhaphak hi hnam hmangaih tharna a nih ngei ka beisei a ni,” a ti a. “Khawvel hmun dangah pawh an ram leh hnamin harsatna an tawh ni hi a tha zawngin an hmang thin a. Japan rama America-in Hiroshima leh Nagasaki a bomb ni chu ‘World Peace Day’ tia hman thin a ni,” a ti bawk.
MZP President H. Lalthianghlima pawhin thu sawiin ram leh hnamin hun harsa a tawh hi theihnghilh mai chi a ni loh thu leh phuba lak tumna leh thinrim tharthawhna tur a nih loh thu sawiin, “Hnam anga tanrualna leh inpumkhatna ni atan i hmang ang u,” tiin, Zofate lo inlungruala inpumkhat hi Mizo hnam dinchhuahna tura thil pawimawh a nih thu a sawi.
Kumin Zoram Ni thupui, ‘Zofate insuihkhawmna hmathlir’ tih hman a ni a, Dr. Vanlalremruata Tonson, Asst. Professor, PUC-in paper a buatsaih chu zir ho a nih hnuah, thupui thlan bik hi sawi hona neih a ni bawk.
He hun hi MZP Vice President C. Lalremruata’n a kaihruai a, MZP General Secretary Chinkhanmanga Thomte chuan Zoram Ni hman chhoh dan a sawi fiah a ni.
He hunah hian MZP bakah, ICFAI zirlaite leh political party bakah NGO hrang hrang aiawhte an tel a ni.