Aizawl: Excise & Narcotics Minister Lalnghinglova Hmar chuan tun dinhmunah sorkarin zu zawrh tumna a neih hriat a ni lo niin house a hrilh.
He thu hi nimina assembly session-a zawhna leh chhanna hunah member-te zawhna chhangin a sawi a, excise minister chuan zu an man dan dinhmun sawi chhunzawmin kumin February thla thleng khan rakzu litre 12,608 man a ni tawh a, zu bilh lai tin 23,484 tihchhiat a ni tawh a, dawidim kg 1,000 man a ni tawh a, a sen chi um puitling um 3,373, um chanve um 334, um chanve chanve leh um 1,473 man a ni tawh tih a sawi.
Ruihhlo man a tam thu sawiin kumin February thla thlengin heroin kg 15.199 man a ni tawh a, heng bakah hian ruihhlo dang tam tham tak an man thu a sawi a, man tawh atanga en chuan a rem lo tih a chiang a, hetiang zat man a nih chuan man loh pawh tam tak a awm dawn a, sorkarin theihtawp a chhuah a, tlawmngai pawl leh kohhrante nen tan tlan a ngai a, ruihhlo do turin mi tin tan tlan angai niin a sawi.
Manipur buaina avangin Mizoram kaltlanga ruihhlo tawlh a tam niin a lang a; mahse, beihpui thlak avangin tual chhung chu a ziaawm deuh nia a lan thu a sawi.
Excise minister chuan tunah hian department chhungah transfer & posting tih mek a ni a, mi 80 lai an transfer tawh a, hei hi chak lehzual zawka ruihhlo an do theihna tura tih niin an department dan ang thlapa an tih thu a sawi a, MLA zingah sawipui pawh awm mah se, tun dinhmunah chuan transfer ngaite an transfer phawt a, minister emaw, officer-te transfer ni lovin danin a sawi angin an kal tih a sawi bawk.