March 6, Nilai zan khan UEFA Champions League last 16 khelh chhunzawm a ni a. Champion lai Manchester City chu an mikhual FC Copenhagen lakah 3-1 a chak nawn lehin quarter-final an lut a. Inkhel dangah an muala chak zo lo Real Madrid in quarter-final an lut ve bawk.
Champion lai Manchester City hian Mimualah 3-1 an lo hneh tawh FC Copenhagen chu Etihad Stadium-ah an mikhual a, chawlhlawk hmaa goal thum an thun hmangin 3-1 bawkin hnehna an chang nawn leh a, si belhkhawmah 6-2 in an khingpuite an hneh.
City hian Etihad Stadium-a an mikhual FC Copenhagen lakah bul an tan tha viau a, inkhel tan atanga minute ngana lekah corner atanga ball kal chu defender Manuel Akanji chuan chiang zetin a pet goal a, hmahruaina goal a thun. 3-1 a hmahruai tawh City in goal an thun hmasak leh tak vangin Danish club lian tan quarter-final luh beiseina a tawp fel ang hiala ngaih a ni nghal der.
An muala bul tan tha tak City hian goal an thun belh leh thuai. Akanji goal thun atanga minute li hnu lekah Julián Álvarez chuan goal thunin an hmahruaina a tizau. Minute 9 chhung leka goal hnih an thun vangin inrintawkna sang zawk nen Pep Guardiola team te an inlan a, chawlhlawk hmain goal khat an thun belh leh.
Hma takah goal hnih chhuah mah se Manchester United pawh hneh thei FC Copenhagen an buai duh bik lova, huai takin City an nawr let ve ngat. An huaisen rah an seng a, Mohamed Elyounoussi chuan minute 29-naah goal thunin an si phurh a sut then. He goal hmang hian phur thar viau mah se hun tawp thlengin goal dang an thun belh thei tawh lo thung.
Goal khat an chhuah zeuh vangin City in goal thun tumin tan an khawh thar leh , Erling Braut Haaland chuan minute 45+3-ah an goal thumna a thun zui leh a, 3-1 hmahruai chungin chawlhlawk an hmang.
Chawlhlawk hnu lamah inkhel hmuhnawm zui viau mah se goal dang a luh belh thei tawh lova, City chuan 6-2 a hnehna changin quarter-final an lut ta a ni.
Nilai zana inkhel dangah UCL a club ropui ber Real Mdrid leh an mikhual RB Leipzig te chu 1-1 in an inhnehtawk a. Mimualah 1-0 a hnehna lo chang tawh Real Madrid in si belhkhawmah 2-1 a hnehna changin quarter-final an lut ve bawk.