Hmanlai chuan sam hi a balhin a thang duh an ti thin a, mahse kha ngaihdan kha at-thlak tak a ni. Sam fai apiang a thang duh a ni. Sam suk zin hi samin a chhiat phah chuang lo va, i sama mawmna kha a tireh chuang lo. Chu ai chuan a hnawnna (moisture) kha a pawi-mawh zawk. Conditioner leh a tihhn^wnna hi kar khatah vawi khat emaw vawi hnih emaw tal hmang thin ang che. I sam chu a fai reng tur a ni a, balin a bawh chuan a tlein a nung thei lo a ni. Tin, ei leh in pawh uluk a ngai a, intluk tawk (balance diet) ngaih pawimawh a ngai a; protein, iron leh vitamin ‘C’ te hi a pawimawh bawk.
- Sam hmawr kak (Splitends):
Sam hmawr kak hi a tihrehna tha ber chu tan hi a ni deuh mai a. Kan sam hi thla khatah 2.5cm velin a thang tlangpui a, chuvangin kar 5 danah 63cm vel tan ziah khan a tha tawk hle a ni.
- A ven theihna dang lehte:
1) Samkhuih ha khat (bit lo) deuh, sam han khuih pawha a tan lohna tur hman thin a tha.
2) Sam chhemrona (hair dryer) hmanin a sa ber hmang lovin a dawttu emaw hmang thin la. Tin, sam hnaih lutukah ken loh tur. Hair dryer hman nasat lutuk hian sam a rovin a kak duh.
3) Sam hmawr tanna Conditioner hman thin bawk tur a ni.
4) Heated rollers leh hot curler hman nasat hian a kak duh bawk.
- Sam ro (Dry Hair):
Kan sam rona chhan hi a tlangpuiin Velocity leh Bleaching leh Colour kan hman nasat avangte hian a lo awm thei a. Boruak bawlhhlawh leh kan ei leh in leh tui avangtein a lo awm thei bawk. Sam a ro chuan sam a bung hma a, sam a thangchak thei lo a ni. Chuvangin shampoo lampang hman a, luvunte uluk taka massage thin tur a ni.
Tin, shampoo leh conditioner pawh sam ro tana siam hmang la. Amaherawhchu, conditioner hi lu leiah ni lovin sam hmawr lamah chauh hmang thin ang che.
Sam mawm (Oily Hair): Sam mawm nei tan chuan ‘Lemon’ atanga siam shampoo hi hman a pawi lo. Sam dum leh sam ni hrup ang chi hi sam ngil aiin a lang mawm hma a, nu tam tak chuan sam hi raipuar lai leh nau neih dawn vel hian a mawm zual bikin an hria a, fa neih hnu hian sam mawmna hi a reh tlangpui a ni. Sam fai leh tle nei tur chuan sam uluk taka suk bik tur a ni.
Henna: ‘Henna’ hi Egyptian hun lai atanga lo awm tawh a ni a. Sam henna hian sam a tinem a, a tinung a, a tithang duh bawk a ni. Luphut pawh eng emaw chen chu a tiziaawm thei a ni. Heng perming lotion (velocity) hmante hian a hlimchhawn-ah henna hi hman loh tur a ni a, a chhan chu sam kir kha a tireh hma duh bik a ni.
- Sam kan henna dan tur chu hetiangin :-
Henna brush-in chhip atanga tan tur a ni a, ‘Clock wise’ leh ‘Anti-Clock wise’ in kaltir tur a ni. A tawpah mam takin i brush ang a, darkar hnih atanga hnih leh a chanve vel chiah tur a ni a, a telh tur chu i sam sei dan azirin i telh mai dawn a ni (e.g. Egg. Lemon, Coffee, etc.). Mahse, dry hair nei tan chuan Lemon lampang chu telh loh tur a ni a, a chhan chu sam a tihro duh vang a ni.
Kan sam zai hi a tlangpuiin 90,000 atanga 1,50,000 vel a ni a. Tin, a thanchak zawng chu thla khat chhungin 30mm (A inch) vel a ni. Hmun lum apiangah sam a thang chak a, naupang lam aiin upa lam sam a thang muang zawk bawk a. Tin, chu lo lehah chuan hriselna azir a ni leh a, kan awmna climate azir leh kan tui hman azirin a danglam thei bawk.
Engang sam pawh lo nei ta ila, sam nalh nei tur chuan enkawl ngun chu a ngai hrim hrim a, a theih hram chuan ni khatah a tlem berah vawi thum tal khuih thin tur a ni. Tin, Scalp Massage leh Turban Therapy-te hi kar khatah vawi khat tal tih thin a tha ang.
- A tihdan chu hetiangin:-
Oil (Coconut/Ollive Oil), etc.) lapuain lulei atangin i hnawih chhuak vek ang a, tin, vibrating massager (current hmang chi) pawh hi a tha hle bawk. I massage zawhah Turban Therapy tui saah towel i chiah ang a, a fu thei ang berin i sawr ang a, chu chuan i lu kha i tuam ang a (vawi thum), chutia vawi thum i tih zawh chuan shampoo-in uluk takin i su ang a, chutichuan i sam chu a nemin a lo tle siau mai dawn a ni. A chhan chu hei hi conditioner chi khat a ni a, a hranpaa conditioner lei a ngai chuang lo. Tin, i sam a ro viau a nih chuan kar khatah vawi hnih pawh a pawi lo.
Heng lo pawh hi kan sam chungchangah hian hriattur leh zawm tur tam tak a la awm a, kan sawi vek seng lo ang.
Heng kan rawn sawi atang ringawt pawh hian uluk taka i zawm chuan i lo nalh theih ngei ka beisei.