Mizoramah Basketball hmanga inelna lian leh ngaihhlut hlawh ber Mizoram Super League (MSL) season 9 semi-final khelh zawh a ni a. Zarkawt BCA hmachhawn turin champion lai Khatla TBL in final an lut.
Khatla TBL hian semi-final thawh khatnaah Bungkawn LB Associates chu point 98-82 in an lo hneh tawh a. Nilai zana semi-final thawh hnihnaah an chak a nih chuan final an lut chiang tawh dawn. Nilai zan khan chak nawn ngei tumin Bungkawn LB A an hmachhawn a, point 95-83 a hnehna changin, final an lut ta a ni.
Semi-final thawh hnihnaah hian Khatla TBL in bul an tan tha a, quarter khatnaah point rukin an chungnung nghal. Quarter hnihnaah point ngain an chungnung zui leh a, point 11 a hmahruai chungin chawlhlawk an hmang.
Chawlhlawk hnu lamah pawh Bungkawn LBA an insiamtha mai thei lova, quarter thumnaah hnufual zawkah an tang nawn leh. Quarter thumnaah point 10 zeta an hnufual zui leh vangin point 21 zeta hnufual chungin quarter hnuhnung ber an hmachhawn a, chak beiseina a chuai hle tawh. Chak ngei tura inngai tawh an nih vangin TBL hi quarter hnuhnung berah an inthlahdah zeuh a, point 9 in an hnufual zawk. Quarter hnuhnung ber hloh bawk mah se, point 8 in hnehna an chang zui ta tho a ni.
Khatla TBL laka an tlawm nawn leh tum hian Bungkawn LB Associates tan Gregory Lee Heckstall a khel tha fal hle a, point 46 zet a thawkchhuak. A mimal point thawhchhuah hi an team in point an thawhchhuah zawng zawng zatve aia tam a tling hial. Hetihlai hian TBL tana point thawkchhuak hnem ber Joshua Aaron Keys chuan point 32 lai a thawkchhuak ve bawk.
Khatla TBL in Bungkawn LB Associates an paltlang tak vangin final-ah Khatla TBL leh Zarkawt BCA an inhmachhawn nawn leh dawn. Anni team hnih hi season liam ta khan final-ah an lo intum tawh a. 1-1 a an inhnehtawk hnuin final thawh thumna, inkhel hmuhnawm zetah TBL an chak a, an champion. Season kal mekah tlawm la nei lo BCA in TBL laka an trophy hloh tawh lak let ngei an tumruh hle dawn a. TBL pawhin final-a an hneh tawh BCA hneh nawn leh ngei an tum dawn bawk.
MSL 9 final thawh khatna hi March 11, Thawhtan zan dar 8:00 khelh a ni dawn a. Zonet HD , Zonet Zawlbuk leh Zonet Empai App ah Live a pekchhuah a ni ang. Final thawh hnihna hi March 13, Nilai zanah khelh a ni ang a. Final hmasa pahnihah chak zawk awm lova an inhnehtawk a nih chuan March 15, Zirtawp zanah Grand Finale khelh a ni ang.