Ningani zinga NBA regular season khelhah Golden State Warriors chuan an khingpui Milwuakee Buck chu point 35 ngawtin an hneh. Pathiani zingah Boston Celtics laka point 52 zeta an mualphona chu Warriors hian Bucks laka an chakna hmangin an khuh mawi.
Season kal meka khel tha tluang hleithei lo Golden State Warriors lakah bul an tan tha viau a, quarter hmasa berah point 8 in an chungnung nghal. Quarter hnihnaah an khel tha chhunzawm viau a, point 12 in an chungnung zui leh a, point 20 zeta hmahruai chungin chawlhlawk an hmang.
Chawlhlawk hnu lamah Milwuakee Bucks an khel tha hret a, quarter thumnaah point 8 in chungnung zawkah an tang ve ta a, Warriors nen an inkar an tizim. An inkar tizim in, quarter hnuhnung berah chak let theih beiseina nei bawk mah se khel tha tak Stephen Curry leh a khelhpuite an dang hleithei lo a, point 23 zetin hnufual zawkah an tang leh ta mai a. An khingpui Milwuakee Bucks lakah Golden State Warriors chuan point 125-90 in hnehna an chang zui ta a ni.
Bucks an hneh tum hian Warriors tan Stephen Curry chuan point 29 a thawkchhuak. Bucks player pawimawh Giannis Antetokounmpo chuan point 23 a thawkchhuak ve thung. Warriors lakah tlawm mah se Bucks hian Eastern Conference-ah pahnihna an luah zui a. Golden State Warrriors hian Western Conference-ah pakuana an luah chhunzawm thung.
Ningani zinga inkhel dangah Orlando Magic chuan point 119-109 in an khingpui Washington Wizards an hneh a, vawi nga an chak zawn ta chiah. Inkhel dangah Los Angeles Clippers chuan quarter hnihnaah point 20-a an hnufual hnuin Houston Rockets lakah 122-116 in hnehna an chang let a. Los Angeles Lakers chu Sacramento Kings lakah 130-120 in an tlawm ve thung.