Kum 20 mi chauh ni chungin Grand Slam pali zinga pakhat USA Open-ah a champion a, World No. 1 a ni nghal hial bawk. Mipa zingah World No. 1 ni thei naupang ber record duhawm tak a siam hnuin inelna ngaihhlut hlawh tak Wimbledon final-ah Tennis player ropui ber Novak Djokovic a hneh a, Wimbledon champion a ni leh hial bawk. US Open leh Wimbledon-ah a champion vangin Tennis in lal thar a nei ta ang hialin sawi a ni a, chu lal thar chu Carlos Alcaraz hi a ni.
Wimbledon 2023 final hmuhnawm takah Novak Djokovic a hneh hnuin Carlos Alcaraz hian fak a hlawh zui hle a. Tennis a player ropui bik pathum; Roger Federer, Rafael Nadal leh Novak Djokovic te theihna leh thiamna nei kawp ang hialin sawi a ni. Tennis player ngainat hlawh ber Roger Federer thiamna ril ang nei, Grand Slam-ah vawi 22 champion tawh Rafael Nadal anga thahrui ngah lehGrand Slam-ah vawi 24 champion tawh Novak Djokovic anga huaisen leh tlo ti ang hialin a chanchin sawi zui a ni a. Lal thar Alcaraz hian fak a hlawh vet vet hle.
Tennis ngainatuten hahipa an fak rawn Alcaraz hian Wimbledon-a a champion hnuin ngai a awh zo lova, champion a harsat ta tlat thung. Champion lai a nihna Cincinnati Open final-ah Novak Djokovic hneh lovin a tlawm a, a trophy a humhim zo lo. Cincinnati-ah a champion nawn zawh loh vangin World No. 1 a nihna pawh a hloh zui thuai. Hemi hnu hian US Open-ah final a lut zo lova, semi-final-ah Daniil Medmedev a hneh zo lo. US Open-ah a champion zawh loh hnuin inelna hrang hrangah champion na nei thei ta lo zel. A champion theih tak loh vang hian a boruak pawh a hniam ta viau. Alcaraz boruak hniam lai hian a elpui lian Jannik Sinner a vul ve viau thung
A boruak a hniam tak viau lai hian Carlos Alcaraz hian a champion hleitheih loh vanga a hnual loh thu a sawi a. Champion leh thuai tura a inbuatsaih thu a sawi.A ropuina nei let leh turin nasa takin a inbuatsaih a, hlawhtlinna chang turin a inrintawk hle.