March 8, Ningani zan khan Europa League last 16, first leg khelh a ni a, Liverpool chuan Mimuala an khingpui Sparta Prague chu 5-1 ngawtin an hneh a, quarter-final an hnaih nghal hle. Chiangkuang taka Liverpool an chak laiin hian EPL club danga Brighton leh West Ham an tlawm ve thung.
- Sparta Prague 1-5 Liverpool
Season kal meka inelna hrang hranga chetha tak Liverpool hi Sparta Prague hmachhawn turin epet ARENA-ah an lenglut a, mikhual an nihna hmunah goal nga ngawt thunin an huangtau hle. Czech Republic club lian goal neih chhun pawh hi Liverpool player in an lama an tih goal a la ni fo bawk.
Carabao Cup champion thar leh EPL a hmahruai mektu Liverpool hian Mimualah an khel tha viau a, goal an thun thuai. Inkhel tan atanga minute sarihna lekah midfielder Alexis Mac Allister chuan hmahruaina goal a thun nghal der. Hma takah goal an thun vangin inrintawkna sang zawk an neih belh a. Mualneitu lamin an goal an veng ngawt thei lo bawk nen Reds in goal li dang an thun belh.
Mac Allister goal thun hnu hian )Darwin Núñez chuan minuute 25-naah Elliots siamsak atangin an goal hnihna a thun a, an hmahruaina a tizau. Uruyuay forwawrd Nunez hian minute 45’+3-ah an goal thumna a thun belh zui leh bawk a, si thum faia hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm viau naa goal chhuah hmasa zawkah an tang tlat thung. Second half tan atanga minute khatna lekah Conor Bradley chuan an lamah a ti-goal palh a, Sparta Prague tan goal a thunsak. Conor Bradley goal thun vangin an inkar zim thar mah se Liverpool an khel tha chhunzawm a, goal dang an thun belh leh thuai. Goal an chhuah atanga minute sarih hnu lekah )Luis Díaz chuan Mac Allister siamsak atangin an goal lina a thun a, an hmahruaina a tizau nawn leh.
Liverpool in an goal lina a thun leh tak vangin chak tur zawk a chiang viau tawh. Jurgen Klopp-a naute hian khel tha chhunzawm viau mah se goal dang an thun belh thei lawk lova, goal lut a han deuh reng rih. Hun rei goal a luh belh loh hnuin hun tawp dawn hnaih minute 90+4-ah Dominik Szoboszlai chuan Liverpool goal thunin a tawp a khar a, Mimualah 5-1 ngawtin hnehna an chang zui ta a ni.
Liverpool tan away-ah 5-1 ngawta an hneh tawh Sparta Prague hi Anfield-ah hneh nawn harsa lo viau tura ngaih a ni a, Reds hian quarter-final an luh ngei a rinawm. An manager Jurgen Klopp thlah nan trophy lian pali lak tum Liverpool in trophy dang an hnaih deuh deuh zel a ni.
- Brighton leh West Ham an tlawm
Ninga zana inkhel dangh EPL club pahnih Brighton & Hove Albion leh West Ham United te an tlawm a, tlak an hnaih ve thung.
EPL-ah pakuana ni mek Brighton hi Italian club lian AS Roma hmachhawn turin Olimpico-ah an leng lut a, mikhual an nihna hmunah si li fai ngawtin an tlawm. Mimualah an tlawm chian em vangin an muala inlan zui tur mah ni se Brighton hian tlak an hnaih hle a ngaih a ni.
Italian Club lian AS Roma tan hian Argentine forwward Paulo Dybala chuan minute 13-naah hmahruaina goal a thun. Dybala goal thun hnuin an khel tha zui viau a, inelna kal meka goal thun thei tak Romelu Lukaku chuan minute 43-naah an goal hnihna a thun a. Si hnih faia hmahruai chungin chawlhlawk an hmang.
Chawlhlawk hnu lamah Roma an khel tha chhunzawm zel a, Gianluca Mancini chuan minute 64-naah goal thunin an hmahruaina a tizau a. Bryan Cristante chuan minute 68-naah an goal lina thunin a tawp a khar a, an mualah phu takin hnehna an chang.
Brighton tlawm rual hian London club lian West Ham United pawh mikhual an nihna hmunah SC Freiburg hneh lovin an tlawm ve bawk. Hammers tlawmna erawh a tam lova, an muala inlan zui tur an ni bawk nen quarter-final luh beiseina sang tak an la nei. West Ham laka SC Freiburg goal neih chhun hi minute 81-naa Michael Gregoritsch thun a ni.
Ninga zana inkhel dangah AC Milan chuan 4-2 in an khingpui an hneh bawk.