March 8, Zirtawpni zing khan NBA regular season khelh chhunzawm a ni a, champion lai Denver Nuggets chuan Eastern Conference hmahruaitu Boston Celtics an hneh. Celtics an hneh tum hian Nikola Jokic chuan triple-double a pui tlin a, NBA-ah a vul chhunzawm zel. Inkhel hmuhnawm takah Chicago Bulls chuan Golden State Warriors an hneh bawk.
Champion lai Denver Nuggets leh Eastern Conference hmahruaitu Boston Celtics ten inkhel hmuhnawm tak an lantir a, quarter hmasa pathuma chungnung zawn Nuggets pawhin thlamuang takin a tawp an khar thei bik lo.Nuggets hi quarter khatnaah point hnihin an chungnung thei hram a, an inbuktawk rih hle. Quarter hnihnaah Nuggets an khel tha lehzual a, point ruka chungnung zui lehin, point 8 a hmahruai chungin chawlhlawk an hmang.
Chawlhlawk hnu lamah Nuggets an khel tha chhunzawm a, inkhel hmuhnawm takah point hnihin an chungnung zui leh a, an hmahruaina a zau leh zual. Point 10 laiin hnufual mah se Celtics an beidawng duh lova, quarter hnuhnung berah point li a chungnungin an inkar an tizim. An inkar zim leh mah se hnehna chan tur khawpin a thochhuak zo lova, champion lai lakah uiawm takin an tlawm zui ta a ni.
Eastern Conference-a hmahruaitu Boston Celtics laka an chak tum hian Denver Nuggets player pawimawh Nikola Jokic chuan point 32 a thawkchhuak a, ball sawhlet vawi 12 a dawn bakah assist vawi 11 a nei tling bawk am season kal meka a vawi 20 nan triple-double a puitlin. Nuggets hi NBA All-Star game khelh hnuah an khel tha zawn a, vawi riat an khelh atangin vawi sarihah hnehna an chang. Eastern Conference hmahruaitu Boston Celtics tan hian Jaylen Brown chuan point 41 lai thawkchhuak mah se a team a chakpui zo lo.
Zirtawp zinga inkhel hmuhnawm takah Chicago Bulls chuan an khingpui Golden State Warriors chu point 125-122 in an hneh. Inkhel hmuhnawm takah hian hun tawp nan second 40 chauh a awm tawh laiin Warriors hian point 119-118 in hma an hruai a, an chak teuh hle. Hun tawp rat thlenga tan khawh Bulls in point pawimawh tak tak an thawkchhuak a, hnehna an chang let ta hial a ni. Zirtawp zinga inkhel dangah Minnesota Timberwolves chuan point 113-111 in an khingpui Indiana Pacers an hneh hram bawk a, inkhel hmuhnawm an lantir.