March 26, Thawhleh zan khan Euro 2024 khel tur zawnna hnuhnung; play-off final khelh a ni a, Ukraine, Poland leh Goergia te an chak a. Euro 2024 khel tur a hriat kim theih ta.
- Ukraine 2-1 Iceland
Ram buai vangin Ukraine chuan an ramah inkhel an hmachhawn thei lova, Iceland nen hian Poland-a Tarczynski Arena-ah an inhmachhawn. Iceland lakah si phur hmasa mah se chawlhlawk hnu lama goal hnih an thun hmangin hnehna pawimawh tak an chang a, Euro 2024 khel turin an tling. Ukraine hi Group E-ah Belgium, Slovakia leh Romania te nen an awm tlang.
Tarczynski Arena-a a inkhel hmuhnawm takah Iceland in bul an tan tha a, Albert Gudmundsson chuan minute 30-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, Indona muala hun hmang mek Ukraine in goal hnih an thun. Minute 54-na lekah Viktor Tsygankov chuan goal thunin an si phurh a sut. 1-1 a nih hnuin inkhel a hmuhnawm chhunzawm viau a, chak tumin an innawr tawn nasa hle. Goal lut a awm belh theih loh reng hnuin hun tawp dawn hnaih minute 84-naah Mykhailo Mudryk chuan Ukraine hmahruai letna goal a thun a. Chelsea forward Mudryk goal thun hmanga hnehna changin inelna lian an hmachhawn thei dawn ta a ni.
Ukraine captain Oleksandr Zinchenko chuan, “Ukrainian ka ni hi ka chhuang a, zalenna kan neih theih nana nunna hlu tak hlan mekte nen thisen inang kan nei hi ka chhuang hle. Hemi chungchang hi kan sawi a ngai a, kan auchhuahpui fo a ngai. Hei hi kan chak theihna kawng awmchhun a ni. Vawiin kan chakna hi game kan khelh tawha hnuk tino thei ber pakhat a ni” a ti.
- A vawi khat nan Georgia
Georgia inelna lian la hmachhawn ngai reng reng lo Georgia chua penalty shoot-out-ah Greece an hneh nawlh a. A vawi khat nan Euro khel turin an tling.
Boris Paichadze Stadium-ah Georgia hian Greece an mikhual a, chawlhlawk dawn hnaih minute 45+3-ah an player Giorgi Loria hnawhchhuah a nih vangin an dinhmun a chhe hman hle. Tlem zawk ni mah se an mualah huaisen takin an inlan a, goal chhuah lovin tlawm an pumpelh ta hial. Tlem zawk ni chunga tlawm an pumpelh hlauh hnuin penalty shoot -out ah an vennei zui a, hnehna hlu ber an chang.
Penalty-ah hian Georgia tana pet hmasa ber Giorgi Kochorashvili-a’n harsatna tawk lovin a pet goal a. Greece tana pet hmasa ber Anastasios Bakasetas chuan a thelh hlauh thung. Georgia tan hian Georges Mikautadze chuan a thelh bawk mah se midang zawngin an pet goal a, Greece tan Giorgos Giakoumakis-a’n a thelh leh tak vangin Georgia hian 4-2 in hnehna an chang ta a ni.
A vawi khatnana inelna lian hmachhawn tur Georgia hi Group F-ah Turkey, Portugal leh Czech Republic te nen an awm tlang a. Point box an nih mai loh nan tan an khawh a ngai viau dawn a ni.
- An mualah Wales an vanduai
Wales hian an khelmual ropui Cardiff City Stadium-ah Poland an mikhual. An muala inlan an nih vangin chak theihna hun tha an neia ngaih a ni a. An muala inlan mah ni se hun tawp thlengin goal an thun thei lova, Poland in an dang tluan thei. Goal thun thei an awm loh vangin tie-break hmangin inelna lian hmachhawn tur zawk tihchian a ni a. Poland lakah vanduaiin Wales an tla a, an mualah mittui a sur.
Wales tan pet hmasa paliin an thun vek laiin a pet hnuhnung ber Daniel James-a’n a pet goal lo hlauh thung. James-a’n a thelh lai hian Poland tana pettu mi panga ten an thun vek si a, Poland hian 5-4 in hnehna an chang zui ta a ni.
Robert Lewandoski captain na hnuaia inlan tur Poland hi group hautak tura ngaih Group D-ah an awm a. France, Netherlands leh Austria te nen last 16 luh an inchuh a ngai dawn.
- Euro 2024 Group hrang hrangte:
Group A
Germany
Scotland
Hungary
Switzerland
Group B
Spain
Croatia
Italy
Albania
Group C
Slovenia
Denmark
Serbia
England
Group D
Poland
Netherlands
Austria
France
Group E
Belgium
Slovakia
Romania
Ukraine
Group F
Turkey
Georgia
Portugal
Czech Republic