- Ruata
Made in India Honda Elevate chu Honda lo chhuahna leh a hmunpui, Japanah ngei mai thawn let a ni ve ta! Khawvel huap sumdawnna lama inelna lian taka awm mup mupah pawh India ram a than nasat zia a tichiang awm e.
Honda Cars India Limited in India rama lirthei an siamchhuah Japan rama an thawn vawikhatna a ni a. Honda WR-V tih hming puin Elevate hi Japan-ah chuan tlangzarh a ni thung a ni. India ram Honda company tan chuan thil lawmawm leh ropui tak, hlawhtlinna lian tak pakhat.
Hei hian India ram hmasawn zia leh heng hmasawnna ruhrel hrang hranga a than zia a tilang chiang hle a. Honda Cars India Limited President leh CEO ni bawk Takuya Tsumura chuan ‘Made-in-India’ Elevate Japan rama WR-V tih hming pua tlangzarh a ni chu an tan hlawhtlinna ropui tak a nih thu a sawi a. Hei hian lirthei siamchhuahna lama Honda Cars India Limited te theihna san zia leh khawvel huapa Honda company sumdawnna chevela India rama an company thawhhlawk theih zia leh pawimawh zia a tilang chiang a ni a ti.
Honda Elevate chu India ramah tunah hian mipuiin an duhna an lantir chhoh mek thu leh market lamah pawh a chetthat chhoh zel thu Takuya hian a sawi a. India rama an lirthei hralhchhuah zinga an innghahna ber a ni chho mek tih sawiin, “Hei hi khawvel huap pawhin thleng se kan duh a, lirthei tha siamchhuak turin theihtawp kan chhuah a ni,” a ti.
Honda Elevate hi India ramah nikum September thla mai khan tlangzarh a ni a. Hetihlai hian thla 6 kalta chhung khan Honda chuan 30,000 lai ramchhungah an hralhchhuak a ni. Japan-ah hian nikum December thla khan Honda WR-V tih hming pua tlangzarh a ni veleh a, Japan market-ah pawh hian a che tha chho viau a ni.
Japanese-spec model bikah hian variant 3 a chhuak a, hengte hi – X, Z leh Z+ te niin rawng chi 5 – Illumina Red Metallic, Platinum White Pearl, Crystal Black Pearl, Gold Brown Metallic leh Meteoroid Grey Metallic an tichhuak a ni.
India rama chhuak mek Elevate nen kawng tam zawkah an inang a. ADAS technology hnuaiah collision mitigation brake, false start prevention function, false rear start prevention function, short-distance collision mitigation brake, pedestrian accident reducing steering, road departure prevention function, adaptive cruise control, lane keeping support system, preceding vehicle start notification function, sign recognition function, auto high beam leh parking sensor system a nei a ni.
A khawl lamah chuan Honda car hoa kan hmuh tam tawh, khawl tha leh rintlak 1.5-litre 4-cylinder naturally-aspirated petrol engine a hmang a. He khawl hian 121bhp power leh 145Nm torque a pechhuak thei a. Transmission lamah chuan CVT automatic unit a hmang a. India-spec model-ah thung chuan kan hriat angin 6-speed manual gearbox nei duhthlan tur a awm tel thung a ni.