Nilai zinga NBA regular season khelah Los Angeles Lakers leh Milwaukee Bucks te an inhnehtawk hle a. Hun pangngai leh overtime vawi khatnaa an inhnehtawk hnuin overtime vawi hnihnaah LA Lakers an chak thei hram. Inkhel dangah Golden State Warriors chuan an khingpui Miami Heat an hneh ve bawk.
An player pawimawh LeBron James tel lova inlan LA Lakers hian Bucks lakah bul an tan tha lo viau a, quarter hmasa berah point 16 zetin hnufual zawkah an tang nghal. Bul tan chhe viau mah se quarter hnihnaah an insiamtha a, Bucks point thawhchhuah zat 26 chiah an thawkchhuak ve a, point 16 a hnufual chungin chawlhlawk an hmang.
Point 16 laia hnufual mek Lakers hian chawlhlawk an hmang tangkai a, chawlhlawk hnu lamah an khingpuite an nihrual. Quarter thumnaah point hniha hmahruaiin an inkar an tizim hret a. Quarter hnuhnung berah point 14 in an chungnung a, tlawm an pumpelh hlauh. Hun tawp nan second 44 chiah a awm tawh laiin Lakers hian an khingpuite point thawhchhuah zat 101 an thawkchhuak a, hun pangngaiah an inhnehtawk.
Hun pangngaiah chak zawk an awm theih loh vangin overtime khelh chhunzawm a ni a, overtime vawi khatnaah point 16 ve ve an thawkchhuak a, an inhnehtawk leh phawt. Chak zawk an awm theih loh fo vangin overtime thawhhnihna khelh chhunzawm a ni a, Lakers in point 11 an thawhchhuah laiin Bucks in point 7 chauh an thawkchhuak thung a. Inkhel hmuhnawm takah LA Lakers chuan point 128-124 in Milwuakee Bucks an hneh ta a ni.
Bucks an hneh theih nan Lakers tan Anthony Davis a khel tha viau a, point 34 a thawhchhuah bakah ball sawhlet vawi 23 zet a dawng tling bawk. Lakers laka uiawm taka an tlawm tum hian Bucks tan Giannis Antetokounmpo chuan point 29 a thawkchhuak a, ball sawhlet vawi 21 a dawn bakah assist vawi 11 a nei tling bawk a, triple-double a puitlin. Antetokounmpo rual hian Khris Middleton chuan point 29 a thawkchhuak a, ball sawhlet vawi 14 a dawn bakah assist vawi 10 a nei bawk a, triple-double a puitlin ve bawk.
Inkhel dangah Golden State Warriors chuan point 113-92 in an khingpui Miami Heat an hneh a, play-off khelh phak beiseina an nei sang thar leh. Warrriors chak rual hian Oklahoma City Thunder chuan point 119-112 in an khingpui New Orleans Pelicans an hneh a, Western Conference hmahruaitu Denver Nuggets an um chhunzawm zel.