Arunachal Pradesh-a India leh China inrina bul lawka khaw pakhata mi pakhat chiah vote thlak buaipui turin thawktute chu kilometre 40 dawn kea an kal a ngai dawn.
April 18-a vote thlak turah Malogam khuaah hian hmeichhe pakhat chiah vote nei a awm a. Kum 44 mi, Sokela Tayang-i vote thlak buaipui tur hian dan pangngai anga thiltih ve tho erawh a ngai thung.
“A tam lam a ni lo, khua leh tui tu pawhin an duh an thlan theihna tur buatsaih a ngai a ni. Sokela Tayang-i buaipui tura chet chhuahna hi intluk tlang taka thil kalpui a nihzia lanna a ni,” tiin Chief Electoral Officer Pawan Kumar Sain chuan a sawi.
Election thuneitute chuan Malogam khuaah hian chhungkaw tlem tê an cheng a, an zingah hian Tayang-i chauh vote nei a ni thung a, mi dangte chu polling booth dangah an nei hlawm niin an sawi a. Ani hi a insawn ve duh lo a ni.
Tayang-i vote thlakna tur hian official, venhim hna thawktu leh porter te nen, hmun danga tih dan pangngai ang thova ti turin tlang chhengchhia, khaw awm dan inthlak thleng thut thut karah thawh chhuah a ngai ve tho dawn a ni.
An khua hi Hayuliang assembly bial, Arunachal East Lok Sabha biala awm niin Congress atangin Bosiram Siram leh BJP candidate Tapir Gao te dinna a ni.
Inthlan hnuhnung ber, kum 2019 khan Gao-a hi Arunachal Pradesh-a bial hnih awma pakhat zawkah a chak a, vote nuai 1.5 chuang a hmu a. Congress atanga chuhtu, Lowangcha Wanglat chu vote 83,935-in a hneh a ni.
“Hayuliang atanga Malogam thleng tur hian kea nileng kal a ngai,” tiin Joint Chief Electoral Officer Liken Koyu chuan PTI hnenah a sawi.
“A hmun chu khawi lai pawh ni sela, tute pawhin an duh an thlah theihna hi a pawimawh ber a ni,” tiin Koyu chuan a sawi.
“Polling team hi zing dar 7:00 atanga tlai dar 5:00 thleng vote thlak niah hian an inhawn ve tho a ngai dawn a ni,” a ti bawk.
Tayang-i hi khuaah hian a cheng bik lo va, a fanu leh a fapa chu college kai niin a awmpui a ni.
“Khuaah hian ka cheng tlem hle a, hna eng emaw tul bik leh inthlan lai erawh chuan ka awm thin a. Huan ka neihna, Lohit district-a Wakro-ah ka awm deuh ber zawk,” a ti.
Kum 2014 inthlanpuiah kha chuan Malogam-ah hian vote nei pahnih an la awm a. Tayang-i pasal thin, Janelum Tayang a ni a, an nupa hi inthenin tunah chuan booth dangah a hming a awm tawh a ni.
“Kum 15 zet kan awm hrang tawh a, khawiah nge a chen pawh ka hre tawh lo,” a ti.
Tayang-i hian vote thlak tur hian April 18 tlaiah in a thlang ang a, a tukah vote a thlak ang a. Hemi ni vek hian an state assembly inthlan atan pawh vote a thlak bawk ang.
Arunachal Pradesh-ah hian polling station 2,226 awmin heng zinga 228 hi kea kal ngai a ni a. Hmun 61 hi ni hnih lai kea kal ngai a ni nghe nghe a, pasarih phei chu ni thum kal ngai a ni.
Inthlana chuh tumte hi March 28-ah endik an ni ang a, March 30 thleng inhnuhdawh theih a ni ang.
Assembly inthlana vote tlate hi June 2-ah chhiar a ni ang a, Lok Sabha hi June 4-ah chhiar a ni thung ang.