Aizawl : Lok Sabha inthlanpui lo awm tur atana inbuatsaihna kal mekah nimin khan Mamit-ah mipuite hnenah vote thlak pawimawh zia sawiin street campaign neih a ni.
Mamit-a street campaign-ah hian Nodal Officer SVEEP/DIPRO Paul Rokima’n Lok Sabha inthlanpui lo awm turah Mizoramah chuan April ni 19-ah vote thlak tur a nih thu sawiin, “mipui tan leh mipui atang ngeia ram aiawh kan thlang thei hi democracy thatna leh hlutna a ni” a ti a. Election commission of India-in mipui vote nei ten vote an thlak chu a ngai pawimawh hle tih sawiin, pianphunga rualbanlo/mahnia che sawn theilo leh kum upa, kum 85 chunglam te pawhin vote an thlak theih dan tur a ruahman thu a sawi a. “Thalai naupang zawk leh harsatna neilo, polling booth pan thei te phei chuan vote kan thlak ngei chu danin min phut tlat a ni” a ti.
Vote thlak pawimawhna inzirtirna hi Mamit Field kawn, Mamit Bazar veng, Mamit Charkawn leh Dinthar Bazar Mamit-ah te neih a ni a. Vawiinah Damdiai, Zawlnuam leh Kawrthah-ah te chhunzawm a ni ang a, Damparengpui, Tuipuibari, Rajiv nagar, Silsuri, Marpara-ah te pawh neih chhoh tum a ni bawk.