Lok Sabha 17-na term zo mai turah Nationalist Congress Party MP pangate chuan zawhna 410 zawtin zawt tam ber an ni a, Apna Dal (Soneylal) MP pahnih chuan panga chauh zawtin zawt tlem ber an ni thung tih Association for Democratic Reforms (ADR) chuan a sawi.
Shiv Sena chuan zawhna 354 zawtin NCP MP-te hi an dawt a. Asaduddin Owaisi-a kaihhruai AIMIM chuan 284, Telugu Desam Party-in 247 leh MK Stalin-a kaihhruai DMK-in 243 an zawt bawk.
Hetih lai hian a zawt tlem ber chu Apna Dal (Soneylal) MP-te an ni a. Akhilesh Yadav-a kaihhruai Samajwadi Party MP-ten pasarih chauh zawtin AAP MP-ten 27, National Conference MP-ten 29 leh LJP MP-ten 34 an zawt bawk.
BJP MP-ten 149 an zawh laiin Congress aiawhtuten 195 an zawt bawk niin ADR chuan a sawi.
YSRCP MP-ten 234 an zawt a, CPI(M)-in 230 leh tun hmaa Telangana Rashtra Samithi (TRS) tih thin, Bharat Rashtra Samithi (BRS) MP-ten 211 an zawt bawk.
ADR-in report a siamah hian term kal mek, zo tepah hian MP 505-ten zawhna 92,271 an zawt a ni.
Ram rorelna in hniam zawka MP-ten zawhna an zawh tam ber chu Health & Family Welfare (6,602) a ni a. Agriculture & Farmers Welfare (4,642), Railways (4,317) leh Finance (4,122) ten an dawt.
State mala tehah Maharashtra MP-te chu zawhna zawt tam ber niin 315 an zawt a. Zawhna zawt tlem ber chu Manipur atanga MP pahnih niin 25 chauh an zawt a ni.
Report-ah hian zawhna zawh zat hi zawhna lut zinga pawm leh Lok Sabha MP tang laiten zawhna an thehlut atanga chhut a ni. MP 543-ten ziaka chhan chi an thehluh atangin 250 leh tawngkaa chhan chi lut atanga 20 chu ballot hmanga thlan chhuah thin a ni.
ADR report-ah hian MP pakhatin zawhna 165 zel zawt ang an ni a, Lok Sabha 17-naah hian thutkhawm vawi 273 awmah member 189 tel ziah ang an ni a. Term liam tur hi chawhrualin kum khat chhunga thutkhawm a tlem ber tum niin vawi 55 chauh thu zel ang an ni.
Lok Sabha 17-naah hian bill 240 pharh a ni a, heng zinga 222 chu pawm niin 11 chu hnuhdawh leh a ni a, paruk chu la tihkhawtlai rih a ni thung.