Aizawl: MNF Publicity Board Vice Chairman J Malsawmzuala Vanchhawng chuan ZPM sorkar tharin sorkar hnathawkte tel lova party hruaitute leh an sangawizawnpui, an mi duh zawng an ruat chhuahte nena thutlukna lian zawng zawng an siam chho zel tur chu Mizoram sorkar kal zel turah a him loh thu a sawi.
Nimin khan Aizawl Press Club-ah thu thar thehdarhtute kawmin J Malsawmzuala Vanchhawng chuan, ZPM sorkar chu ni 100 chuang hlek chhunga sorkar kutke pawimawh an vuah chhoh dan leh an hmalakna tam takah mipuite pawmpui theih loh leh beisei loh thil a tam ta hle tih sawiin, “ZPM sorkar hlawhchhamna hmuh tur tam tak a awm der tawh hi pawi kan ti a, beiseina sang tak nena thuneihna petu mipuite an ti beidawng chho mek hi vanduaithlak kan ti takzet a ni,” a ti.
J Malsawmzuala Vanchhawng chuan ZPM chu mipui sorkar ni lovin, party sorkar, official te pawh ring zo lo sorkar an sawh nghet chho mek tih a sawi a. Hetih lai hian, December 8, 2023-a Ni 100 chhunga sorkar hmalakna tur chief minister in a puanah, point 6-naah ‘Sorkar official te tel lova sorkar a kal theih loh thu leh dik taka hna an thawh tlan a duh thu’ a sawi tih sawiin, “Sorkar hmalak tawh dan en erawh chuan ZPM Sorkar hian official-te a ngaipawimawh lo mai nilovin engahmah a ngai lo zawk hial niin a lang chho ta zawk a ni,” a ti bawk.
Chief Minister Office atangin, Governor hmingin Committee pawimawh eng emaw zat din a ni tawh tih sawiin MNF Publicity Board Vice Chairman chuan, “He’ng committee-ah hian member-ah official lam an tel ngai lo a. Sorkar hmalakna tur, flagship programme leh programme dang pawimawh tak tak tihlawhtling tura din committee-ah te member atana official ruat an ni lo zel mai hian entir dang a nei lo,” tia sawiin, ZPM sorkar hian official pawimawh tak takte a ring zo lo a, official te tel lovin party mi thenkhat leh an sangawizawnpui mithenkhatte nen sorkar hi an khalh kal dawn tihna a, a vanduaithlak hle tih a sawi.
Committee pawimawh tak taka official tel awm ngawih ngawihte pawh tel tir an ni lo hian entir dang a nei lo tih sawiin J Malsawmzuala Vanchhawng chuan, “ZPM sorkar hian Mizoram sorkar official te a ring tawk lo a, Mipui sorkar ni lovin, official te ring tawk lo sorkar, party sorkar an sawh nghet chho mek tih a lantir a, an laka beiseina sang tak neitu mipuite an phatsan chho zel tih a lantir a ni,” a ti.
J Malsawmzuala Vanchhawng chuan ZPM sorkar kal mek danah hian mipuite hnena an inzawrhna lo ang zelin an kalah MNF chuan an ngaih thu a sawi a. Beiseina sang tak neia thlang tling tute beisei an phaloin, kalphung thar an zawrh chuan kalphung hlui an sawi chhiat tam tak pawh a phalo hleah an ngaih thu a sawi bawk.
- State Planning Board-ah hian tun hma atangin Chief Secretary te, Commissioner/Secretary Finance te, Secretary Planning te an tel thin a. Anni bakah hian expert/mi thiamte member ah ruat thin a ni a. ZPM Sorkarin Planning Board a dinah hian Member Secretary bak chu official an lang miah lo a, Chief Secretary te, Finance leh Planning Secretary te an tel lo.
- Inthlan campaign lai khan Chief Minister Candidate Lalduhoma’n Val Upa Council member-te hi sorkar viltu leh khalhtu, a tul huna khak a, minister te pawh koa zilhtu tur an ni tih a sawi thin a, Planning Board member-ah VUC hotupa Prof. Thangchungnunga a tel leh ta tlat bawk.
- Mizoram State Policy Coordination Committee-ah pawh Member Secretary bak official dang pakhat mah telh an ni lo a, member pasarih te chu sorkar official ni lo, pawn lam mi vek an ni a, Chief Secretary tak ngial pawh telh a ni lo hi a mak hle.
- Mizoram Resource Mobilization Committee (MRMC) ah pawh Member Secretary tih loh chu Mizoram sorkar official pakhatmah an tel lo a, member 11 ruat te chu non official vek an ni.
- Mizoram Education Reform Committee din takah pawh official (Mizoram sorkar hnuaia thawk lai) pakhat mah an tel lo a. Mizoram zirna siamthatna tura committee pawimawh ber turah hian zirna lam Dept hotute, Secretary Education or Higher & Tech Edn. tak ngial pawh an tel lo a, Director te tal pawh an tel lo a, a teuh ber, Committee Secretary chu Dy. Director pension tawh a ni.