Ningani zana Indian I League (I League) khelhah Aizawl FC chuan RG Stadium-a an mikhual Churchill Brothers chu si li faiin an lo sawp a, an mualah hnehna an chang ve leh ta nawlh. Churchill Brothers an sawp tum hian Lalrinzuala chuan Aizawl FC tan goal hnih a thun a, season khatah I League-a goal thun hnem ber record thar a siam a, India player ropui Sunil Chhetri record a khum.
An muala chak harsat, season chawhnu lama talbuai ta deuh tlat Aizawl FC hian an mikhual Churchil Brothers lakah bul an tan tha vul chuk bik lo na a, hun tawp dawn hnaihah goal hnih thunin a tawp an khar tha thung. Lalrinzuala ropui zanah hian minute 28-naah Lalrinzuala hian hmahruaina goal a thun a. I League ah season khata goal thun hnem ber record awm mek Sunil Chhetri leh Mohamed Rafi te goal thun zat goal 14 a nih rual. Goal khat a thun leh a nih chuan I League record a siam thei dawn a, RG Stadium-ah tan a hlawh zui hle.
AFC hian minute 28-naah goal thun mah se goal dang an thun belh mai thei bik lo va, goal thun belh turin an ngah deuh vang vang a ngai. Hun tawp dawn hnaih minute 73-naah Lalthankhuma chuan goal thunin an hmahruaina a tizau.
An goal hnihna an thun vangin champion hlui Aizawl FC an phur leh zual a, goal dang an thun belh leh thuai. Minute 86-naah Lalthankhuma chuan an goal thumna thunin an hmahruaina a tizau. Inhnaihchilh taka goal an thun vangin AFC an phur a, Churchil Brothers an buai ve thung. An mikhualte talbuai lai chungin Aizawl FC hian an nawr chiam a, goal an thun leh nghal zat. Lalthankhuma goal thun atanga minute hnih hnu lekah Lalrinzuala chuan an goal lina a thun a, I League record thar a siam ta a ni.
Churchill Brothers lakah goal hnih thun Lalrinzuala hian Indian I League season kal mekah Aizawl FC tan vawi 18 a khel a, goal 15 a thun tling der tawh. I League season khatah goal 14 ve ve thuna season khata goal thun hnem record lo siam tawhtu Sunil Chhetri leh Mohamed Rafi te record a khum. India player ropui ber Sunil Chhetri hian I League-ah goal 14 thun turin game 25 a mamawh laiin Mizo tlangval Lalrinzuala erawh chuan goal 15 thun a, record thar siam turin game 18 chiah a mamawh ve thung. Lalrinzuala’n I League-ah record a siam rual hian India national team head coach ni mek Igor Stimac demna thawm a rin phah zual sauh.
World Cup 2026 khel tur zawnnaah India an chetha lova, an khelh hnuhnung berah an mikhual Afghanistan hneh lovin an tlawm ringawt. Ranking-a hniam zawk Afghanistan an hneh loh hnuin coach Stimac leh senior player thenkhat in dem an hlawh zui viau a. Stimac leh India tana goal thun hnem ber Sunil Chhetri ten dem an hlawh nasa zual. India coach Stimac hi ram tan khel tur zawnnaah a hawi zau tawk lova ngaih a ni a, I League a record hial siamtu Lalrinzuala an hmuhhmaih rei lutukte hian sawi a hlawh zui hle. Rinzuala hian ISL club a zawm rin a ni a, a hming a lian zual zel dawn.
Churchill Brothers sawptu Aizawl FC hian khelh 20 atangin point 24 an hmu a, pakuanaah an awm mek. AFC tan champion beisei ngam a ni tawh lova, an tlahniam thei tawh lo bawk.