Zo rimawi khawvel a huhang ngah leh lar tak ni bawk Lalrindiki Khiangte (Daduhi) chu Union Biblical Seminary, Yangon leh IHOP University, USA tangkawp chuan Honorary Doctorate Degree (Doctor of Music, Vocal) an hlan.
Chawimawina ropui leh duhawm tak hlan anih chungchangah Daduhi hian lawmpuitu leh duhsaktu a ngah hle a, social media kaltlangin lawmpuina a dawng mawlh mawlh mai.
An zingah hian zaithiam chuai thei lo Rebecca Saimawii pawh telin, “Dr. Daduhi Khiangte ka nuam lo deuh a, rawn inentir ka duh a. Tak tak a, thiannu, ka thinlung chhungril ber atangin ka lawmpui a che. I phu takzet!,” tiin a lawmpui.
Doctorate Degree dawng thei a ni hi Daduhi tan lawmna sawisen loh a ni a, mumangah pawh a man phak ngai loh thil nia sawiin, “Kei tehlul Honorary Doctorate Degree min han hlan hi phu lo inti tak chungin ka dawng ve a, ka lawm em em a, mumang ah pawh ka mang phak ngai loh thil a ni. Ropui ka ti a, min lawmpui ve ngei pawh ka ring a ni.
“Thenkhat tan chuan ‘ho’ tak te pawh a ni ang, ka tan chuan a ropui ngawih ngawih a ni. Lalpa chauh chu fak in awm rawh se. Ka tan Lalpa a tha a ni. Aw.. ka tan hian a tha vel vek a ni,” a ti.