Pathianni zan dar 9:00 hian Etihad Stadium-ah inkhel pawimawh leh ngaihven hlawh zet mai a awm dawn a. Champion lai Manchester City leh hmahruai mektu Arsenal an inhmachhawn dawn.
Table-a hmahruai mektu Arsenal hian khelh 28 atanga point 64 an hmu a, pathumnaa awm City aiin point khatin an sang zawk mek. City an hneh a nih chuan Gunners hian hma an hruai chhunzawm ang a. City lakah an tlawm a nih erawh chuan pathumnaah an tlahniam thei thei. Champion beisei zui turin Gunners hian chak an mamawh viau. An mualah an chak ta lo a nih pawhin City hi chu talbuai zui lova, champion zui thei tura rinkai an ni tho thung. Liverpool defender hlui Jamie Carragher chuan, “City hi Arsenal lakah an tlawm a nih pawhin an la champion thei. Arsenal hi an tlawm a nih chuan an tan champion theih a nih ka ring tawh lo.” tiin Arsenal tak chak a pawimawhzia a sawi.
City hi player tha tak tak kawl khawmtu ni bawk mah se hliamin a tibuai nasa a. An defender rinrawl pahnih; Kyle Walker leh John Stones ten Arsenal an hmachhawn thei dawn lo. Anni pahnih awm lo tur hi Arsenal tan chuan Etihad Stadium-a tlangnel phah sawtna tham a ni ang.
Stones leh Walker bakah hian Kevin de Bruyne, si nghak Ederson leh Akanji te dinhmun a chiang lo mek bawk a. An ni panga hi an chhawr thei lo rual thawt a nih chuan City tan inrintawk a har ang.
Arsenal leh City hi EPL-a an intum hnuhnung ber chu October 8, 2023 kha a ni a. Emirates stadium-ah inkhel in. mualneitu Arsenal in 1-0 in hnehna an chang. City hian an mualah hneh let ngei an tum dawn a. Arsenal hi an lawn tawhna kungah lawn nawn leh tumin, City lakah chak nawn leh ngei an tum ve bawk ang.
City leh Arsenal te an inkhel hma hian pahnihnaa awm mek Liverpool chuan Anfield-ah Brighton an mikhual dawn a. Liverpool hi an mualah an chak a, City leh Arsenal an inhnehtawk a nih bawk chuan Reds hian hma an hruai nawn leh ang.