Miss Chapchar Kut 2024 thlan zawk taka winner Laltanpuii (18) chu heti ang hian biangbiakna neih a ni:
- ENGVANGA MISS CHAPCHAR KUT 2024 A TEL NGE I NIH? CONTESTANT TE IN INHMUHKHAWM KHAN I RILRU A LANGSAR?
Miss Chapchar Kut ah hian tum reng vanga tel ka ni lo a, ka thiannu nen Zo thuam em em pawh in bel loin, Chapchar Kut chhim turin kan kal a, scout pathum laiin min biak hnu in, ka hming, veng leh phone number an la a, Hawla Auditorium-ah kal tura tih ka ni nghal ani. Contestant te kan in hmuhkhawm khan ka tan chance sâng tak a awm ka ringlo nghal a, an hmeltha hlawm in, an puitling hlawm si a, ka rilru chuan tel leh loh mai ka tum hman!
- CONTESTANT DANG TE AIA DANGLAMNA EMAW LANSAR BIKNA TE I NEI EM?
Danglam bik na em em ka nei chuanglo a. Mahse, midang aia ka naupanna hi ka lansarh bikna chu ani mai.
- MISS CHAPCHAR KUT 2024 WINNER NI TA LO LA, TUNGE WINNER NIH I RIN BER? A CHHAN LEH VANG?
Winner lo ni ta lo ila, Vanlalzami hi Miss Chapchar Kut anih ka ring ber a, a hmeltha in a puitling a, mi fak leh duh a hlawh em em a, ka chhungte tam tak paw’n hmeltha an ti in, an sawi fo a ni.
- HMELTHA BERAH AN THLANG BAWK CHE A, TUNGE I CHHUN LE?
Ka nu leh pate hi ka chhun hle a, ka nu hi ka chhun deuh bik.
- MISS CHAPCHAR KUT 2024 INTIHSIAKNA ATANGA ZIRLAI I ZIRCHHUAH TE?
He intihsiakna a ka zirlai zirchhuah te chu –
Kum naupang te ah pawh thil lian tham tak tak kan suangtuah naah pawh kan ngaihtuah phak ngailoh kan hlawh chhuak thei ani tih te, thutlukna lian tham tak tak te pawh engnge lo thleng tur tih hre lawk miahlo a siam pawilohzia te, mahni inrintawk pawimawhzia te ka zirchhuak.
- ENGTI ANG TAKIN NGE I NUNAH I CHHUNGTE AN PAWIMAWH?
Ka chhungte hi ka nun ka hlut ang bawk hian ka ngaihlu a, an tello chuan engmah ka nih loh avangin ka tan an pawimawh em em ani
- CHIEF MINISTER NI TA LA, ENGNGE I TIH HMASAK BER ANG?
Chief minister lo ni ta ila chu kan zirlai zir dan kal phung hi thlak ka duh a, mimal a thiam tak tak te thiam na pholang thei tur zawk a hma lak a, byheart system lam a kallo in, mahni thiamna ngei a pass theih turin ka siam danglam ang.
- I MUT DAWN A I NGAIHTUAH THIN LEH RILRU A LO LANG THIN TE?
Ka mut dawnah hian zan a hahdam tak leh tui taka min mut tir leh thintu Pathian hnenah lawmthu ka sawi thin a, nileng a ka hun hman te ka ngaihtuah let thin.
- TUNHNAI MAIA HRINGNUN ZIRLAI I ZIRCHHUAH LANGSAR?
Thutlukna lian tham tak pawh hi thil lo thleng tur hre lawk lo a siam hi alo pawilo hle tih ka zirchhuak.
- I CHHUNGTE NI LO ZINGA NANGMAH THLAWPTU LANGSAR BER?
Min thlawp tha em em tu chu ka thianpa Lalruatsanga a ni
- MISS CHAPCHAR KUT 2024 WINNER AN PUAN HMA CHIAH A I RILRU?
Engzat na pawh lo ni ila ka in pawm vek a. Pathian kaihhruaina zarah top 5 lai ka thlen tawh avangin ka nihna naah lungawi takin ka in pawm thlap ang, tiin rilru ka siam fel.
- CROWN HLAN I NIH CHIAH KHAN I RILRU AH ENGNGE LO LANG LE?
Tet te atang Miss thlan na te hi ka lo en ve thin a, crown an in hlan hian mi pawimawh, mi zahawm, mi te duh rawn leh mi bik riau an niin ka hre thin a, nih ve ka châk thei em em a, ka lo suangtuah ve nasa thin a, ka tet lai a ka suangtuah na kha alo thleng dik ang, tih ngaihna ka hrelo. Pathian hnenah lawmthu ka sawi mawlh mawlh tawp mai ani.
**
Miss Chapchar Kut 2024- Laltanpuii hi October 17, 2006 khan a piang.
A nu leh pa te hi Lalngaihawma leh Lalthari te an ni.
Aizawl, Tuikual North-ah an cheng.