- Ruata
India ram lirthei company hmingthang Tata Motors chuan an premium hatchback hmingthang, Altoz chu a thar, Altroz Racer an tichhuak dawn a, an tlangzarh har tawh loh beisei a ni.
Media report thenkhat phei chuan thla thar a nih loh pawhin kar hnih khat a liam chuan Altroz Racer hi an tlangzarh mai an beisei thu an sawi a. Altroz hi tarlan tawh angin premium hatchback chhunga Hyundai i20, Maruti Suzuki Baleno leh adangte nena inel mek a ni a. A mawiin a changkang a, lei pawh a hlawh viau a, chei pawh a hlawh a ni.
Tunah hian sports car design lam ngaina tan Altroz chu Racer model a rawn chhuak dawn a ni a. Tata Altroz sports version lo mithla thin tan chuan thu lawmawm tak a ni dawn a. A elpui zingah Hyundai chuan an sports version i20 N Line an tichhuak tawh a. Hemi nen pawh hian inel viau turah a beisei theih ang.
- Tata Altroz Racer?
Tata Altroz Racer kan tih chuan sports car design anga kawng hrang hranga cheibawl Altroz tihna a ni deuh mai a. Nikum Auto Expo-ah khan Altroz racer hi Tata chuan an lo phochhuak tawh a. Kumin Bharat Mobility Show-ah an rawn phochhuak leh a, tlemin hetah hian a landan a rawn danglam hret thung a. Tata lam chuan an tlangzarh dawn nge dawn lo tih heng hunlai pawh hian an sawi chhuak lem lo na a, tunah chuan an tichhuak ngei dawn tih a chiang ta a, a chhuah hun pawh a hnai tawh hle tih a chiang bawk a ni.
Altroz Racer hian Altroz iTurbo hman ang 1.2 litre, three cylinder, turbo petrol khawl a hmang ve dawn a. Hetihrual hian Altroz racer khawl hian 120hp power leh 170Nm torque te a pechhuak thei thung dawn a. iTurbo variant aiin power lamah 10hp leh torque lamah 30Nm in a pechhuak tam thung dawn a, Tata Nexon te khawl pekchhuah theih ang a rawn mil dawn thung tihna a ni. Altroz Racer hian transmission lamah chuan 6 speed manual a rawn neih ve ngei a beiseiawm bawk a ni.
A rawng lamah chuan dual tone paint scheme a nei dawn a. A hma fender-ah ‘racer’ badge a nei ang a, a grille leh alloy te pawh design thar a rawn ni dawn bawk a ni. Tata SUV thar hoa kan hmuh ang 10.25 inch touchscreen lian zawk a rawn neih hmel bawk a. Report thenkhat chuan a huanga a hmasa ber turin ventilated front seat, heads-up display, voice assisted sunroof tihte a rawn neih beisei a nih thu an tarlang a ni.
Engpawh ni se, Tata Altroz Racer chanchin kimchang, dik leh chiang zawk hi kan hre thei thuai dawn a. Company lam ngaihchan zel a ngai rih dawn a. Lirthei chhuak mek, lar sa leh hralh kal ni mek hoah sports version a rawn chhuak ta pheuh pheuh mai a. Helam hi lirthei siamtuten an awn chho leh dawn nge a hriat loh na a, company tin hian sports version lirthei neih tumin an lirthei chhuak mek te an rawn khawih danglam chho sup sup lo ang tih erawh a sawi theih loh a. A lirthei leitu lam te ‘demand’ tam leh tam loh azir te pawh a nih hmel bawk a ni.