International break a nih hnuin Inrinni zan atang khan English Premier League 2023-24 khelh chhunzawm a ni a. Inrinni zana inkhelah team lian Manchester United leh Chelsea ten hnehna an chang zo lo. Inkhel dangah Everton an chak lova, an tan tlakhniam a hlauhawm deuh deuh zel.
- Brentford in United an chelh
Team lian, champions league khelh phak ngei tuma tan khawh Manchester United chu table hnuai lama awm mek Brentford hmachhawn turin Gtech Community Stadium ah an lenglut. United hian hun pek belhah goal thunin an chak teuh hle a. Hun tawp dawn tepa Ajer goal thun hmangin Brentford in an chelh a, United an chak zo lo.
Gtech Community Stadium-a inkhel hmuhnawm takah goal a thun har viau a, ball chang tam zawk ni mah se United in shot an nei bik chuang lo. Tlakhniam pumpelh tuma tan khawh Brentford tlarhnung an inrem fuh viau a, United tlarhma a mite an duh angin an taltir duh bik lo. Brentford player ten United player te an zim tawt a, hmunawl an pe duh lo. Minute 90 chhungin goal lut a awm thei lova, hun pek belhah pawh goal a lut lawk thei lova, goal awm lovin an inhnehtawk tura ngaih a ni hman.
Goal lut a awm thei dawn lo emaw tih hnu minute 90+6-ah United in goal an thu ta nawlh. United a zawm hnua boruak nei lian lem lo tak Mason Mount chuan Casemiro siamsak atangin United hmahruaina goal a thun. United tana Mount goal hmasa ber hmangin Red Devils hian hnehna an chang tura ngaih a ni tawh a, hun a tlem tawh em vangin Brentford in goal an thun hman a rinawm tawh lo viau. Dinhmun chhe takah ding mah se Brentford an chiai buai mai lova, huaisen takin an mikhualte an nawr chhunzawm. Huaisen taka inlan Brentford tan hian Kristoffer Ajer chuan Ivan Toney siamsak atangin minute 90+9-ah goal thunin an si phurh a sut. Ajer goal thun hnu lawkah hun a tawp zui a, Brentford leh Manchester United te chu 1-1 in an inhnehtawk zui ta a ni.
Brentford lakah an chak zawh loh vangin United tan champions league khelh phak a hla leh zual. United hian khelh 29 atangin point 48 an hmu a, paruknaah an awm mek. Palinaa awm mek Aston Villa aiin point 11 zetin an hniam zawk mek. Brentford laka an chak zawh loh laiin an elpui lian Aston Villa leh Tottenham ten hnehna an lo chang chuan an dinhmun a tikhirh zual. UCL an khel phak lo a nih chuan United thuneitu ten an manager Erik ten Hag an ban ngei tura ngaih a ni.
- A mualah Chelsea an chak zo lo
Team lian, player lei nana sum seng hnem thin Chelsea chuan result tha an lei thei lo chhunzawm zel. Tabe laihawl luah phak chang chang Chelsea hi Stamford Bridge-a an mikhual Burnley lakah tam zawk ni reng chungin inlan mah se an chak thei chuang lo va, an mikhual Burnley nen hian 2-2 in an inhnehtawk.
Table hnuai ber dawttu-a awm mek Burnley hi Chelsea an hmachhawn tumin an vanduai a, minute 40-naah Lorenz Assignon hnawhchhuah a ni a, penalty an chawi zui bawk. He penalty hi Cole Palmer chuan pet goal in minute 44-naah hmahruaina goal a thun a. Blues hian si khat faia hmahruai chungin chawlhlawk an hmang. Tam zawk ni chunga hma an hruai bawk vangin Chelsea hian an mualah awlsam takin hnehna an chang zui ngei tura ngaih a ni.
Chak theihna hun nei tha viau mah se Chelsea an che chhe tlat thung a, chawlhlawk hnu lamah goal an chhuah thuai. Second half tan atanga minute hnihna lekah Brownhill siamsak atangin Josh Cullen chuan goal thunin an si phurh a sut. Foal khat ve ve an thun hnuin inkhel a hmuhnawm chhunzawm a, goal thun tumin Chelsea in tan an khawh nasa viau a, Burnley an him hram hram zel. Hmahruaina goal thuntu Palmer chuan minute 78-naah an hmahruai nawn lehna goal a thun a, Palmer goal hnihna hi an chakpui ngei tura ngaih a ni nawn leh.
Tlem zawk ni chungin hnufual nawn leh mah se Burnley in tlawm an tum bik bau lo. Huaisen taka an inlan rah an seng a, minute 81-naah Dara O’Shea chuan Cullen siamsak atanga goal thuin an si phurh a sut nawn leh. O’Shea goal thun hnu hian goal dang a luh belh thei lova. Chelsea chuan an mualah ngei chak theihna hun tha an neih an chhawr tangkai thei lova, uiawm takin Burnley lakah poit hnih an hloh.
- Everton an vanduai
Point paihsak an nih vanga dinhmun chhe zawka ding Everon an talbuai chhunzawm. Toffees hi AFC Bournemouth lakah 2-1 in an tlawm a, an dinhmun a derthawng deuh deuh zel.
An mikhual Eveton ton lakah Bournemouth in goal thun lawk thei lo mah seDominic Solanke chuan minute 64-naah hmahruaina goal a thun. Hnufual zawk an nih hnuin Everton in goal thun ngei tumin tan an khawh nasa leh zual a, hun tawp dawn hnaihah an hlawhtling. Beto chuan minute 87-naah an si phurh a sut. Mimualah point hlawhchhuah an inbeisei viau laiin hun tawp dawn hnaih minute 90+1-ah Everton player Seamus Coleman chuan an lamah a ti-goal palh a. He goal hmang hian Everton hi vanduaithlak takin an tlawm zui a, dinhmun chhe zual zawkah an din phah ta a ni.