- Lallunghnema, Charity Lodge
Mizoram State Sawrkar chuan Bus neitute, conductor leh bus driver-te zawm ngei ngei turin Aizawl City Bus chuan man a siam danglam leh ta a. He Fare thar hi 26th March 2024 atanga hman tan tur a tih a ni a. He ka thu ziah hi a chhuah hunah meuh chuan hman tan a ni tawh ngei ang. He Fare thar chungchangah hian thlir dan hrang hrang a awm thei a. A sang ti pawl an awm laiin a la sang vak love, ti an awm bawk. A hniam ti erawh an awm lem lovin ka hria a. A pawimawh ber chu ‘tihhlawhtlin, tihpuitlin’ a ni. Thupek reng reng a hmangtu consumer leh a lek kawhtu bus service leh Sawrkar an ni a. Mitin kan pawimawh a nih ber chu!
Hetiang hi City Bus Fare thar a ni a. Secretary, Aizawl City Bus Owner’s Association, Aizawl, Mizoram in a hming a ziah hnan ani. I han thlir teh ang.
Stand Approved Fare (in Rs)
0-1 8
0-2 10
0-3 12
0-4 15
0-5 18
0-6 18
0-7 20
0-8 20
0-9 20
10 20
11 20
12 25
13 25
14 25
15 25
16 25
17 30
18 30
19 30
20 30
21 35
22 35
23 35
24 35
25 35
- Mipui mawhphurhna :
He City Bus chuan man(fare) thar hi a pawimawh hle. Kan khawpui economy khawih a ni. Bus fare a chuang a liama kan chawi tling khawm hi a ‘kilhkelh’ chuan sawi a har mai thei. Pawisa nawi tling khawm hi a tam tham viauin a rinawm.
Tin, vahvelna nana taxi aia a lo tlawm Ei avang hian senso a tlem zawk a ni. Mipui vahna a, sum senso hi transport means hman a zirin a hautak hlei thei a ni. Chuvangin khawsak senso tlem leh awmze nei zawka awm duh chuan city bus kal hi a ni a. Mi rethei tan chauh ni lovin, mipui vantlang chunglam tan pawh a ni, tih hriat tur a ni. Bus Fare aia tam pe lo turin kan inzirtir a, kan inhrilh lawm lawm a. Mahse, kan zawm tha duh lova, kan awi tha duh hek lo. Tul lovah pawisa kan seng thlawn fo a ni. Mipui hian he fare thar hi a lo hlawhtlin nan tan kan la thei, kan la tur a ni bawk.
I len chhuah hmâin pawisa nawi ngaihtuah lhmasa thin rawh. Pawisa nawi(thir) Bus fare dik takin i hmang thei ang. Bus fare hman dik loh chhan bul ber chu ‘pawisa nawi’ vang a ni. Bus passenger-in pawisa a neih lohva, Bus conductor-in a neih loh bawk chuan harsatna a thleng thei a ni. Chuvangin i thlen chin tur hre chiang hmasa in kal chhuak rawh. Bus-a i chuan dawn chuan Rs, 2 thir te, cheng 1 thirte nei thlap rawh. I pawisa nawi kha naupang pe mai mai suh. Pawisa nawi neih sa thlap hi a hahdam thlak a, a zangkhai thlak a, sawrkar policy tihhlawhtlinna hmanraw tha ber zinga mi a ni. Gas i lak dawnin pawisa nawi i nei lawk ang kha a ni. Thil harsa a ni lo. Intihhmuhna tha tak a ni.
Bus fare thar kan thlir hian stand khatnaah cheng riat pek a ngai a. Chumi atan chuan Rs. 5/- note leh cheng 2 thir, cheng khat thir nei lawk ang che. Stand 3-naah hian Rs. 12/- i chawi a ngai a, cheng sawm note leh cheng 2 thir pek mai tur. Rs. 12/- chawina tura Rs. 15/- i neih tlat chuan conductor tan pawh a buaithlak thei a. Ani tana inkir harsa anih chuan ‘Ni mai rawh se’ tih hi a awl em em a ni. Hei, stand 5 leh 6 naah Rs. 18/- a lo lang. Heng atan te hian pawisa nawi inrin mai a tha. A bakah hi chu pawisa nawi tulna a awm lem lo va, cheng 5, cheng 10, cheng 20 note neih a ni tawh mai.
LP Gas Distributor te chuan indawr a awlsam zawk nan “Pawisa nawi neih tur” an ti lawk thin a. Bus fare atan pawh hian pawisa nawi a ngai tho a ni. Chuvangin bus a chuang tur tupawhin pawisa i inring theuh teh ang u. Ka thuchah tlar khat lek hian kawngro su mawlh rawh se. A pawimawh lutuk si a.