Sawrkar kum kalta chhung khan Transport department hnuaia Aizawl Enforcement staff-ten dan bawhchhia an man lirtheite sum chawi tlingkhawm chu cheng nuai 120 a tling.
DTO Aizawl hotute sawi danin, sumdawn nana hman lirthei hoin dan an zawm tur an zawm loh avangin lirtheite hi manin sumfai an chawitir thin a. Chutihrualin, dan ang diak diaka sum an chawi dawn chuan an chawi tur hi a san lutuk avangin a na lo thei ang berin an hrem thin tih an sawi a ni.
April 2023 atanga March 2024 chhung khan lirthei 3092 vel dan bawhchhia mante sum an chawi tir a, e-challan a chawi mi 35 an awm. Dan bawhchhia an man, an sum chawi tur ang la chawi lo mi 1000 chuang an la awm a, e-challan a lock an nei nual bawk tih an sawi. e-challan lock tih hi, lirthei dan bawhchhia, enforcement staff hotu duty-naa dding duh loa tlan tlang emaw, a hmuna chawi nghal tur nei lote an registration tihtawp sak lailawkna a ni.
Hemi hun chhunga dan bawhchhia lirtheite sum chawi tlingkhawm hi Rs. 121,68,500 a ni a. Kumin March thla chhung bik khan sum chawi tlingkhawm hi Rs. 12,02,000 a ni a, e-challan ah Rs. 2,13,000 niin, a vaia sum an chawitir hi Rs. 14,15,000 a ni.
Dan bawhchhiatna zingah tax an chawi hun tura chawi lo, an certificate thi tawh leh insurance thi a tam ber tih Transport department hotute hian an sawi a. Lirthei neitu nawlpuiin tax pek an ngaihsak lo thin hle nia an hriat thu sawiin, commercial vehicle ah insurance chawi hi a san deuh avangin tih loh phah an awm thin nia a lan thu an sawi bawk.