April 1, 2024 (Thawhṭanni)-ah Revd Dr Chuauṭhuama Memorial Committee buatsaihin Synod Conference Centre, Mission Veng, Aizawlah Revd Dr Chuauṭhuama piancham denchhenin a nun leh rawngbawlna avanga lawmthu sawina hun hman a ni a. He hunah hian a lehkhabu ziah Bawih Ṭhahnem Lo: Kum 17+ Sulhnu tih leh mi hrang hrangin Revd Dr Chuauṭhuama chungchanga an thu ziah lak khawm Lalpa Chhiahhlawh Revd Dr Chuauṭhuama: Miten Tu Nge A Ni An Tih? tih lehkhabute chu tlangzarh a ni bawk.
He hun hi Rev Dr Lalawmpuia Hauhnar-in a kaihruai a. Dr Rosy Zoramthangi Ralte-in hunserh hmangin Rev Dr H. Vanlalauvan kamkeuna thu bengvarthlak tak a sawi a. Rev Zosangliana Colney-in Revd Dr Chuauṭhuama chanchin ngaihnawm tak (eulogy) a sawi a, Nl. F. Lalzamlianin Pathian fakna hla sa-in Revd Dr Chuauṭhuama nun leh rawngbawlna video clip hmuhnawm tak chu entir a ni bawk.
Bawih Ṭhahnem Lo: Kum 17+ Sulhnu tih hi Revd Dr Chuauṭhuaman Mizoram Synod hnuaia a thawh chhung kum 17 leh a hnu lama a inhmanna hrang hrang a ziah a ni a. He lehkhabu preview hi Rev Dr LH Rawsean neiin Rev Dr FH Liansangzualan a tlangzarh a ni. Lehkhabu pakhat zawk Lalpa Chhiahhlawh Revd Dr Chuauṭhuama: Miten Tu Nge A Ni An Tih? tih hi Revd Dr Chuauṭhuama chungchanga mi hrang hrang thuziak lak khawm a ni thung. Upa R. Lallianzualan he lehkhabu preview hi neiin Rev Prof Tlanghmingthangan a tlangzarh.
He inkhawmah hian Revd Dr Chuauṭhuama ṭhiante pahnih Pu P. Vanluia leh Rev Lalchhuanmawia te bakah mi ṭhahnem takin thu ngaihnawm leh bengvarthlak tak tak an sawi a. Revd Dr Chuauṭhuama nupui Pi Lalchhumin ṭawngṭaina hun hmangin a fanu Dr Elsa Lalramzauvi Pachuau-in lawm thu a sawi a. Inkhawm hi Rev Dr Vanlalnghaka Ralte-in malsawmnain a ṭin a ni.
Revd Dr Chuauṭhuama hi Mizo Pathian thu thiam langsar ber zinga mi, Mizo hnam leh kohhran ṭhatna tur leh hmasawnna tura huaisen taka au chhuak ṭhin leh thuziak mi thawhhlawk tak a ni a. January 4, 2024-ah khan heart attack avangin a boral a ni.