Tunhnaia to thli tleh leh ruahsur avangin Mizoram hmun hrang hrangah chhiatna a thleng nual a, mi pakhatin nunna a chan a; DM&R Minister K Sapdanga’n vanduaina tawkte tanpuina pek thuai an ni dawn tih a sawi.
March ni 31 zan laia Mizoram chhung hmung hrang hranga thlipui leh rial thawkin chenna in tam tak a ti chhia a, khuarel chhiatna thlenga vanduaina tawkte tanpuina pe turin sorkarin ruahmanna siam nghal a, DM&R minister K Sapdanga chuan thawhlehni atangin tanpuina hi an sem chhuah tan theih an beisei tih a sawi.
K Sapdanga chuan chhiatna a thleng tih an hriat veleh DM&R hotute nen an thukhawm nghal a, rangva leh sipaulin bakah tanpuina awm theite an ngaihtuah a, pek chhuah vat tura an ruahman thu a sawi.
Khuarel chhiatna thleng avang hian Malsawmtluangi kum 45, Bungkawn Vengthar chuan nunna a chan a, DM&R atanga thudawn danin, Malsawmtluangi hi a fanu pasal nei tawh te chenna Hunthar Vengah riakin, tukin khan a riahna in bula a tu nu nena an kal lai chu thing tlu in a delh a, vanduaina thlenna hmunah hian a boral nghal a, a tunu naute erawhin hliam a tuar lo nia thudawn a ni a.
DM&R Minister K Sapdanga chuan thing tlu avanga boral Malsawmtluangi tanpuina pek dan tur pawh department hotute’n an ngaihtuah nghal a, vanduaina tawk chhungte an tawrhpui hle tih a sawi.
DM&R in nimin tlai dar 5 vel thlenga report an dawn tawh chinah thli tleh leh rial tla avang hian Mizoram pumah chenna in chhia 647 awmin, Koalsib district chhungah tam berin, in 407 a chhia a, a dawt Khawzawl Dsitrict ah in chhia 71 awmin, a bak Aizawl District-ah 64, Serchhip district chhungah 53, Hnahthial district chhungah 20, Champhai district chhungah 17, Saitual ah 10, Mamit-ah 5 leh Lunglei district chhungah in 1 chhia a awm a, district pahnih Siaha leh Lawngtlai district atangin in chhia report a la awm rih lo a ni.