BJP President Vanlalhmuaka’n rorel lai ZPM party chu NDA zawm duh, zawm hlei thei chiah si lo, Tuilairapa awmah a puh a, state-a sorkarna fawng an chelh hnua an zuk dawrna apiangah an la hlawhtling lo tih a sawi.
Lok Sabha MP inthlanpui neih tura BJP candidate ni bawk Hmuaka chuan vawiin khan Aizawl Press Club-ah chanchnibu mite kawmin, ZPM te chungchang a sawi a, Chief Minister Duhoma leh a thawhpuite’n sorkar laipui hotute an dawrin an hlawhtling lo hle a, khum beuh leh Mizo shawl chi hrang hrang zu pe in thla kan zu lakpui kha kan thlen san theih tawk niin a lang, a ti.
Hei hi a chhan chu state inthlanah BJP chu ar chuk tui lo khawpa sawi chhiaa, BJP inhlauh siakna leh induh lohsiakna thlarau hmanga vote an zawn thin vang niin a sawi a, mahni aia fing zawk bum tum leh beih vak chu hlawk lo tak a nih thu a sawi.
Hmuaka chuan, MNF dinhmun pawh sawi langin NDA member ni ber a inngai MNF lah hian NDA neitu BJP chu a chhung lam atanga do an tum thu hmangin vote an zawng mek a, Central sorkar chak tak mai lo do vel hlawk lozia hrechiang tu chu Pu Zoramthanga leh a thawhpuite an nih thu a sawi.
BJP president chuan Hmuaka chuan, Lok Sabha MP inthlanpuiah hian BJP in MP 370 party malin lak ngei an in beisei a, NDA a an thawhpui party thenkhatte nen chuan MP 400 chuang neiin sorkarna an siam leh ngei dawn tih a sawi a, Mizoram aiawh tura MP atana thlan tlin a nih chuan Mizoram mipui leh state sorkar mek pawhin kawng tinrengin an hlawkpui dawn tih a sawi.
PM scheme hrang hrang mumal lo taka kalpui mek leh suasam te chu a nih tur angin a taka kalpui a ni dawn tihte, thlan tlin a nih chuan Union minister nihna an pek ngei an beisei thute, sorkar laipuia an hotute’n an lo tiam tawh angin Mizoramin hmasawnna hmel thar a hmu ngei dawn tiin, Mizoram mipuite chu hmasawnna an duh chuan an fin thiam a ngai a, an vote hlu tak pe ngei turin a sawm tih a sawi bawk.