International break a nih hnuin kar tawp khan tualchhung league hrang hrang khelh chhunzawm a ni a. Europe a league lian zual pangaa hnuhma langsar kan thlir kual leh ang a. Player ropui pahnih; Lionel Messi leh Cristiano Ronaldo te hnuhma thar kan thlir kual zuai bawk ang.
- English Premier League
Pathianni zan khan champion tuma inum pathum zinga pahnih Manchester City leh Arsenal te chu Etihad Stadium-ah an inkhel a, goal awm lovin an inhnehtawk. Manchester City hian an mualah khelh 57 chhung zet goal an thun zawn tawh an ni a. Khelh 57 chhung zet goal an thun zawn hnuin Arsenal lakah goal an thun thei lova, Gunners in City record kal lai an chelh din sak.
Arsenal hian season kal mekah Manchester City lakah goal an chhuah lova, Pep Guardiola enkawl team lakah season khata game hnih an inhmachhawna goal chhuah lo zawn palina chiah an ni. Arsenal hma hian Borussia Mönchengladbach (2014-15), Manchester United (2020-21) leh Crystal Palace (2021-22) Pep Guardiola enkawl lakah game hnih chhung goal an lo chhuah lo zawn tawh.
Pathianni zan tho hian Liverpool chuan Anfield-a an mikhual Brighton lakah si an phurh hmasak zet hnuin hnehna an chang let a, season kal mekah si phurh hmasa chungin vawi sarih hnehna an chan letna chiah a ni. Reds hian EPL chanchinah goal chhuah hmasa zawk chunga hnehna chang let tam ber an ni nghal bawk.
Brighton an hnehna goal hi hun tawp dawn hnaiah Mohamed Salah thun a ni. Salah hian Premier League-ah goal 155 a thun tling tawh a. EPL-a goal thun hnem 9-na niin, a chung chiaha awm mek Jermain Defoe chu goal sarih chauhin a phak lo. Salah hian season kal meka inelna hrang hranga goal 34 zetah a inrawlh tling a. EPL player zingah amah aia goal a inrawlh hnem awmchhun chu goal 35-a inrawlh tling tawh Erling Haaland a ni.
Chelsea tan Cole Palmer a vul viau a, season kal mekah club record pahnih a siam der tawh. Palmer hian EPL season kal mekah goal 12 a thun tling tawh a, kum 22 hnuai lam player zingah Chelsea tan season khata goal 12 thun tling hmasa ber a ni a. Blues tan hian goal 12 a thun bakah assist vawi 8 lai a nei bawk a. Chelsea player awm tawh zawng zawng zingah goal 20-a inrawlhtling thei naupang ber a ni bawk. Hei mai hi a la ni lo cheu. Palmers hian penalty atangin goal ruk ngawt a thun tawh. Hei phei hi chu EPL record a ni hial a. Under 22 player zingah EPL-a penalty pet goal hnem ber a ni.
Inrinni zanah Manchester United nen 1-1 a an inhnehtawk tum khan Brentford chuan United box-ah ball vawi 85 lai an tawk a. Season thum liam ta chhungah Manchester United box a ball tawk tam ber an ni.
- Spanish La Liga
Hmahruaitu Real Madrid chuan inrinni zan khan Santiago Bernabeu-a an mikhual Athletic Club chu si hnih faiin an hneh. Real Madrid hi La Liga season kal mekah tlawm nei lovin khelh 24 chhung an kal tluang tawh a, kum 27 zet hnuah La Liga-a tlawm an neih loh zawn rei ber a ni.
Athletic Club hian Real Madrid hi an ngam lo ve hrim hrim a, Reaal lakah hian khelh 18 chhung zet chak an nei lo zawn tawh a, an club chanchina an ngam loh ber an ni.
Real Madrid tan hian England midfielder pawimawh Jude Bellingham a chetha zui zel. Borussia Dortmund atanga Real zawm thar Bellingham hian season kal mekah goal 20 a thun tling tawh a, assist vawi 10 a nei tawh bawk a, La Liga player zingah goal thun leh siamsak lama 10 chin chung lam nei kawl hmasa ber a ni a. Europe’s top 5 leagues-ah bik chuan a chungah hian Harry Kane (37 G, 10 A) leh Mohamed Salah (22 G, 12 A) te an awm.
Xavi-a’n a hna a bansa dawn tih a puan hnuah Barcelona an khel tha zui ta teh tlat. Xavi a chhuak dawn tih an hriat hnuin Barca hi vawi 11 zet tlawm nei lovin an kaltluang der tawh. Barcelona hian inrinni zan khan an mikhual Las Palmas chu 1-0 in an hneh. Palmas hian League-ah bik Barca hi khelh 20 chhung zet an hneh thei lo zawn tawh.
Girona in Real Betis an hmachhawn tumin Cristhian Stuani chuan stoppage time-ah chakna goal a thun. Kum kal mekah Liga-ah hian stoppage time-a chakna goal thun vawi 28 zet a awm tawh a. Hei hi kum dang zawng zawng aiin vawi li ngawtin a tam tawh zawk. Real Betis laka chakna goal thuntu Cristhian Stuani hian La Liga-ah goal 99 a thun tling chiahj bawk.
Defender lar Sergio Ramos chuan inrinni zan khan a piancham phaphak vawi 38 lawm nan an khingpui Getafe lakah goal a thun. Ramos hi kum 38 tlin tawh hnua Sevill tana goal thun thei awmchhun a ni.
- Italian Serie A
Ruben Loftus-Cheek chuan AC Milan tan goal ruk a thun tling ta a. English player zingah AC Milan season khata goal ruk thun tling hmasa ber a ni.
- German Bundesliga
Inrinni zanah Hoffenheim an lehthal hram vangin Bayern Leverkusen chu season kal meka inelna hrang hrangah khelh 39 zet tlawm nei lovin an kal tluang ta a. Xabi Alonso enkawl mek Leverkusen hian Bundesliga-ah tlawm nei lova season hmang zo turin khelh sarih chiah an mamawh tawh. Europe’s Top 5 leagues-ah tlawm nei lova season hman tluan tlemte chauh an awm a. Chungte chu; Preston North End, Athletic Club, Real Madrid, Perugia, AC Milan, Arsenal leh Juventus te an ni a. Leverkusen hian bung thar kai ve ngei an tum.
Bayern Munich laka chak harsat, khelh 11 chhung zet chak nei lo zawn tawh Borussia Dortmund chuan inrinni zan khan si hnih faiin Bayern Munich ngei hi an hneh ve ta nawlh. Aplril 2024 hnu lamah Dortmund hi Bayern lakah si hniha an chak leh hmasak ber tum a ni ta bawk.
Julian Brandt chuan season kal mekah assist vawi 11 a nei tling tawh a, hei hi Bundesliga-ah assist a ngah tum ber a ni a. Season kal mekah hian Leroy Sane leh Alex Grimaldo ten assist vawi 11 an nei ve tawh bawk.
- French Ligue 1
PSG si nghak Gigi Donnarumma chuan kim lo chunga Marseille an hmachhawn tum khan save vawi 10 zet a nei a. Kum 17 zet hnuah game khata save ngah ber a ni.
- Messi – Ronaldo
Lionel Messi chu hliam vangin a inlan thei lo chhunzawm a, Inter Miami game-ah a inrawlh thei rih lo.
Messi a inhliam lai hian Cristiano Ronaldo erawh chuan a career-a a vawi 64 nan hattrick a lo siam ve thung. Al Nassr in 5-1 ngawta Al Tai an hneh tumin Ronaldo hian hattrick a siam a. Hei hi club tan hattrick a siam vawi 54 na a ni a. Club leh ram tan hattrick a siam tawh zawng zawng chu 64 lai a ni thung.
Footballer ropui Ronaldo hian season kal mekah goal 39 a thun tling tawh a. 2017-18 season-ah Real Madrid tan season khata goal 44 a thun hnuah season khata goal a thun tam leh ber tum a ni.