Lok Sabha MP inthlanpui lo awm turah BJP official candidate, BJP Mizoram President ni bawk Vanlalhmuaka chuan thlan tlin a nih chuan Hachhek bial tlangdunga awmte chu bank account hawnsak vek a tum thu leh sorkar laipui atanga hamthatna zawng zawng an dawn vek tur thu a sawi.
Nilaini khan Vanlalhmuaka hian Zamuang khuaa Community Hall-ah vantlang inkhawm an buatsaih thu sawiin, kalkhawm mipuite hnenah a thlawna gas connection bakah mi rethei in sak tanpuina zawng zawngte chu Mizoramin BJP MP a neih chuan an sdawn vek tur thu a sawi a. Loneitute, kum 60 an tlin hnua pension an pek tur thu leh Hachhek tlangdungah Rural Bank hawn ngei a ni dawn bakah, Hachhek tlangdung a mite bank account hawnsak vek a tum thu a sawi.
BJP Mizoram candidate Vanlalhmuaka chuan Mizoramin MP thusawi thei ringawt ni lo, thil ti thei a neih ve a tul tih sawiin, “Mizorama sorkarna chelh mek ZPM sorkara minister ten central-a Mizoram mamawh an thlen hunah leh puih an ngaih hun a pui tur a, Bible a Josepha dinhmun ang kha BJP MP Candidate in a ka hna tur leh ka dinhmun tur a ni a. Mizoramah eitur a awm theih nan a Aigupta buhzem bula thu tur ka ni dawn a ni,” tiin, Mizoramin he hun tha hi a bawh pelh lohna turin party politics dah tha a, BJP MP Candidate a nih anga Mizoram tana vote theuh turin a ngen.
Lok Sabha inthlan lo awm turah BJP Mizoramin campaign beihpui an thlakna kal zelah, nimin vek khan Mamit-ah vantlang inkhawm an buatsaih a. He hunah hian BJP Mizoram tana Election management committee chairman, Dr K Beichhua, MLA chuan thu a sawi bawk.
BJP Mizoram thuchhuahin a tar lan danin, Mamit district chhunga Hachhek bial chhung, Zamuang leh Mamit-a vantlang inkhawm an buatsaihah an party-ah mi thar 294 an lawm lut a ni.