NBA regular season khelh mekah Eastern Conference hmahruaitu Bonton Celtics chuan Oklahma City Thunders an hneh a. Games ruk khelh hmabak la awm chungin Eastern Conference league champion an ni chiang tawh. Ningani zinga inkhel dangah LA Lakers chuan Washington Wizards an hneh ve bawk.
Eastern Conference hmahruaitu Boston Celtics hian Oklahoma City Thunder lakah a khel tha viau a, point 35 zetin chungnung zawkah an tang. Quarter khatnaah point 7 in an chungnung nghal a. Quarter hnihnaah point 7 bawka chungnung zui lehin, point 14 a hmahruai chungin chawlhlawk an hmang.
Chawlhlawk hnu lamah Thunder game a kang ve hret a, quarter thumnaah point 4 in chungnung zawkah an tang. Quarter thumnaa chungnung ve hlek mah se Celtics er let an tuar lova, quarter hnuhnung berah point 17 zetin an hnufual zui leh a. Celtics lakah hian point 135-100 zetin tlawm zawkah an tang zui ta a ni.
Oklahoma City Thunder lakah hnehna an leh tak hnuin Celtics hian season kal mekah vawi 60 hnehna an chang a, tlawm zawkah vawi 16 tang tawh bawkin NBA regular season-a an khelh that ber tum a ni. Season kal mekah khelh hmabak paruk la nei chungin conference champion an ni chiang tawh bawk. Thunder an hneh tum hian Kristaps Porzingis chuan point 27 a thawkchhuak a, ball sawhlet vawi 12 adawng tling bawk.
Celtics an chak tluan viau lai hian Toronto Raptors erawh an chak lo tluang ve thung. Raptors hian ningani zinga an khingpui Minnesota Timberwolves lakah point 133-85 in an tlawm a, a zawna a vawi 15 nan an tlawm zawn. Inkhel dangah Milwaukee Bucks chu Memphis Grizzlies hneh lovin an tlawm ve bawk. Bucks hian an player pawimawh Damian Lillard, Khris Middleton leh Patrick Beverley te hliam vangin an chhawr thei lo chhunzawm zel a, hei hi an tuar hle.
Toronto Raptors leh Miluakee Bucks te an tlawm laiin Los Angeles Lakers chuan point 125-120 in an khingpui Washington Wizards an hneh ve thung. LA Lakers hian Western Conference-ah pakuana an luah mek a. Play-in khel phak dinhmunah an ding mek. Wizards laka an chak tum hian Anthony Davis chuan point 35 a thawkchhuak a, ball sawhlet vawi 18 a dawng tling bawk. Lakers player pawimawh LeBron James chuan point 25 a thawkchhuak a, ball sawhlet vawi kua a dawn bakah assist vawi 7 a nei tling bawk.