Election commission of India-in Lok Sabha MP inthlana vote thlak tura polling station pan thei lo, kum upa leh rualban lote an inah vote thlak a rem tih angin Mizoram hmun thenkhatah chuan nimin atangin in lamah vote thlak tan a ni.
Lok Sabha MP inthlanpui atana home voting kalpuina hmasa ber hi Lunglei Dsitrict niin, vawiin khan Zobawk, Rahsi Veng, Rualalung, Buarpui-ah te kum upa leh rualbanlote chu an inah vote thlak tir tran an ni a, Home Voting buaipui tura ruat te’n buaipuiin, vote thlak lai hi uluk takin video-a lak zel a ni.
Poling Station pan thei loa, an chenna ina vote thlak tate hian BLO te kaltlangin dilna an thlen a, Lunglei district chhunga an ina vote thlak dil, phalsak tak te hi mi 55 an ni.
Aizawl district ah chuan home voting hi april ni 8 atanga ni 10 chhung kalpui a ni dawn a, Aizawl District Election Officer, bawrhsap ni bawk Pi Nazuk Kumar in a sawi danin, Aizawl district bikah hian in lama vote thlak tur hi mi 874 awmin, an zinga 54 te chu pianphunga rualbanlote niin, mi 820 te chu kum 85 chung chunglam an ni.
An chenna in vote thlak phal sak te hi kum 85 chin leh an taksa zaa 40 chuang rualban lohna te an ni a, heng mite hian polling station an pan theih loh avanga an ina vote thlak phalna an dil tur a ni a, dilna lut zawng zawngte chu uluk takin zirchian zel a ni.