Election department-in Lok Sabha MP inthlanpui neih turah vote a tlak that nan kawng hrang hrangin hma an la a, zirlaite vote thlak tura an khuaa haw duhte chu an attendance in a tawrh loh nan ruahmanna siam a ni.
Mizoram Chief Electoral Officer Pu Madhup Vyas hovin sorkar hotute chu nimin khan Lok Sabha MP thlan huna vote tla a that theihna tur hrang hrang relin an thukhawm a, CEO chuan a tlem berah MP election hmasa aia 5% tala vote tla a pun theihnan theihtawp chhuaha tran tlan a ngaih thu a sawi.
Thutkhawmah hian Higher & Technical Education Department hotute chuan Mizorama sawrkar leh private college zawng zawngah vote tla a that nana hma la tura ngenna an thawn thute, zirlai zingah an khaw lama vote thlak tura haw ngaite tan chawlh pek an nih tur thu leh an attendance in a tawrh dawn loh thute an tarlang a, School Education Department pawhin zirna in zawng zawngah zirlai vote la nei lo te pawh inthlanpui pawimawh zia an hrilh hria tihte, an chhungte zinga vote nei ten an thlak ngei theihna tura hmanraw tangkai ni tura inzirtirna an kalpui thute an sawi.
Thutkhawma tel Sports & Youth Services Department pawhin an hnuaia NCC leh NSS zawng zawngte bakah Adventure Club 81 hnenah vote thlak tura infuihna leh midangte zirtir chhawng tura ngenna an thawn chhuak tih an sawi a, Science & Technology Department pawhin an thawhpui NGO hrang hrangte kaltlanga hma la tura an inbuatsaih dan te tarlangin, Mizoram Pollution Control Board hnenah an hnuaia eco-club hrang hrangte nen thawkho a hma la tura ngen nise an ti a ni.