Inrinni zana English Premier League khelhah team lian pahnih; Arsenal leh Manchester City ten Mimualah hnehna an chang ve ve a, table chung berah Arsenal an kir. Pathianni zanah Liverpool an chak a nih chuan EPL table hi a danglam leh nghal thung ang.
- Laipui a puak tha
Hmahruaitu thar ni leh tura chak mamawh Arsenal chu Brighton & Hove Albion hmachhawn turin American Express Stadium-ah an leng lut. An lenluhna mualah Gunners an khel tha viau a, Laipui vawi thum ngawt an tihpuah laiin goal an chhuah lova, Mimualah si thum faia hnehna changin, point thum an hmuh belh.
Arsenal hian mualneitu Brighton lakah khel tha viau mah se goal erawh an thun mai thei bik lo. Hnuhnawm taka inlan Mikel Arteta team hi chawlhlawk hmain an vannei a, penalty an hmu. Gabriel Jesus laka Tariq Lamptey penalty chawi hi Bukayo Saka chuan minute 33-naah a pet goal a, hmahruaina goal a thun. Saka goal thun vangin Gunners hian inrintawkna sang zawk an nei a, chawlhlawk hmain goal thun belh thei bik lo mah se, an khel a nghet zui hle thung.
Chawlhlawk hnu lamah Arsenal an khel tha zui viau a, goal pawh an thun belh leh thuai. Arsenal a zawm hnua vul thar leh ta riau Kai Havertz chuan Jorginho siamsak tha tak atangin goal a thun a, minute 62-naah an goal hnihna a thun. Si hnih faia hma an hruai hnuin Gunners an hlauhawm zui viau. Manager Arteta-a’n player a siksawi kual a, goal an thun belh leh. Bench atanga lut Leandro Trossard chuan Havertz siamsak atangin minute 86-naah an goal thumna a thun a, an chakna a nem nghet. Trossard goal thun hnu hian goal dang a luh belh thei tawh lova, Arsenal chuan si thum faia hnehna changin point thum an hmu ta a ni.
Brighton laka an chak vangin Arsenal hian khelh 31 atanga point 71 hmuin Liverpool an lehpel lailawk a, EPL hmahruaitu an ni nawn leh. Liverpool nen hian an inkarah point khat a tla zep mek. Tarlan tawh angin Liverpool hian pathianni zan khan Manchester United an hmachhawn a. United lakah an chak a nih chuan Arsenal hi pahnihnaah an tlahniam leh ang.
- City tan De Bruyne a vul
Inrinni zana inkhel dangah champion lai Manchester City chuan 4-2 in Crystal Palace an hneh a, a zawna vawi li champion tumin hma lam an pan zel. City tan hian Kevin de Bruyne a khel tha viau a. Belgium midfielder De Bruyne hian City tan goal 100 thunin, mel lung pawimawh a phun.
Champion lai City hi Crystal Palace hmachhawn turin Selhurst Park-ah an lenglut a, mikhual an nihna hmunah goal an chhuah hma hle. Mualneitu Palace tan hian Jean-Philippe Mateta chuan minute 4-na lekah hmahruaina goal a thun. Hma taka goal an chhuah vangin City an buai lova, an si phurh an sut har lo. Minute 13-naah Kevin de Bruyne chuan goal thunin an si phurh a sut a, 1-1 a inhnehtawk chungin chawlhlawk an hmang.
Champion nawn leh thei tura chak zel mamawh City hi chawlhlawk hnu lamah an khel tha leh zual a, goal thum ngawt an thun belh. Minute 47-na lekah Rico Lewis chuan goal thunin an hmahruaina a tizau. Lewis goal thun hnu hian Erling Haaland chuan minute 66-naah an goal thumna thunin an hmahruaina a tizau a. Haaland goal thun atanga minute li hnu lekah De Bruyne chuan an goal lina a thun belh zui leh zat a. Palace tan Odsonne Édouard chuan minute 86-naah goal thunin, an si phurh a sut then naa goal dang an thun belh theih loh vangin an mualah an tlawm. Pep Guardiola team City chuan 4-2 a hnehna changin, point thum an hmu ta a ni.
Crystal Palace an hneh tum hian City tan Kevin de Bruyne a khel tha viau a, goal hnih a thun bakah assist vawi khat a nei bawk. Midfielder ropui de Bruyne hian City tan goal 100 a thun tling chiah a, City tan mel lung pawimawh a phun.