Spanish Copa del Rey final-ah vawi ruk ngawt an tlawm zawn hnuin Atheltic Bilbao chu an champion ve ta nge nge. Inrinni zanah Copa del Rey final hmuhnawm takah Athletic Bilbao hian penalty shoot-out ah Mallorca an hneh.
Sevilla khawpuia Estadio Olímpico de la Cartuja-ah Copa del Rey final hi khelh a ni a, Athletic Bilbao leh Mallorca te chu hun pangnaiah 1-1 in an inhnehtawk. Final-a vanduai thei tak Athletic Bilbao lakah Mallorca in bul an tan tha a, minute 21-na lekah Dani Rodríguez chuan hmahruaina goal a thun. He goal hmang hian si khat faia hmahruai chungin Bilbao in chawlhlawk an hmang.
Chawlhlawk hnu lamah an si phurh sut ngei tumin Bilbao in tan an khawh a, goal an thun thuai. Minute 50-naah Oihan Sancet chuan goal thunin an si phurh a sut. Sancet goal thun hnu hian hun tawp thlengin goal dang a luh belh thei lova, penalty shoot-out hmangin champion tur zawn chhunzawm a ni. Athletic tana pettu mi pali; Raúl García, Iker Muniain, Mikel Vesga leh Álex Berenguer ten an pet goal vek laiin Mallorca tana pettu pahnih; Manu Morlanes leh Nemanja Radonjic ten an thelh thung a. Atheltic Bilbao chu an champion ta nge nge a ni.
Mallorca hneha an champion hi Copa del Rey-ah Athletic Bilbao vawi 14 champion na a ni a. Kum 1984 hnu lamah an champion lehna hmasa ber a ni bawk. Kum 40 chhung zet trophy lak nei lova an awm char char hnuin hlimna ni an nghakchhuak a, Copa del Rey-ah an champion ta nge nge.