- Lallunghnema, Charity Lodge
Consumer Column lo hlutsaktute, in za vaiin chibai ka bûk a che u.
He kan chênna consumer khawvelah hian mi chi hrang hrang kan awm a. Consumer-te dikna leh chanvo ngai pawimawh tak tak an awm laiin eng a mah a ngai lo inti hria, intifing tak tak an awm bawk a. Heng mite hi an lêng za a ni. Dam chhan mumal pawh nei lo, nung ve mai mai kan awm bawk. Nupui neih awlsam tak, then leh zung zung hmuh tur an awm teuh bawk a. *Dawrkai leh sumdawng zingah anmahni dawrtute eng a mah a ngai lo, hmusit tak an awm reng a. Heng dawrkai leh sumdawngte hi an chapo êm êm a, an customer-te an hmusit hle thin. Customer care an tlachham a, mahse customer an neih tlemin hrehawm an ti hle si thin a ni.
Hmanni khan ka chhungte nen Aizawl City bus-ah kan chuang ve a.Busa ka thut chhung chuan Bus conductor fel ang reng tak hi ka titi pui a. He Conductor hian Bus fare dik taka a lak thin thu min hrilh a. A entawn tlak khawp mai. A thu hrimin mipui ning khawng hriat nan bus a chuan hi intihhmuh tur niin ka hria a. Bus fare thar hman a nih hnuah hian pawisa nawi pawimawh zia uar takin ka sawi thin . Consumer Huang chhuak hnuhnung berah khan ka ziak a nih kha. Gas i lak dawn a, pawisa nawi i nei lâwk ang khan bus a i chuan dawn chuan i thlen chin tur hisâpin ngaihtuah lawkin pawisa cheng 5, 10, 20 pawisa thir ak thin ang che,tiin kan infuih a nih kha.
Tunlai hian chêng 10 thir hman theih loh a nih thu a lar hle a. Cheng 10 thir lâk duh loh hi mipui zah lohna, sawrkar zah lohna a ni. Ka sawi duh ber chu, bus fare inrin lawk hi a ni. I intih hmuh teh ang u.
- March 27 Nilaini zan dar 8 khan Govt. Zirtiri Residential Science College-in Consumer Awareness Online Meeting an buatsaih a.Kei tehlul hi Resource Person atan min sawm a.Ka lawm rualin ka huphurh viau a ni.Ka huphurh chhan chu kan, ‘tun lai hmanrua,’ hi a ni a.Ka thiam nâl lo hle a. Mahse,thenawm tlangval Chaman min pui tha bawk a,ka mualpho lo hrâm a ni. Châma chungah hian ka lawm hle.
Ka chhungte hnenah pawh lawmthu ka sawi.Anni,ka chhungte zarah hian kum 20 chuang zet chu consumer- te dikna leh chanvo ka buaipui theih phah a ni.Article ka ziak a,complaint ka buaipui a,lehkhabu ka ziak a,meeting -naah ka tlangau thei bawk.
- He Online Meet thupui atana kan thlan chu ‘Consumer Right & Issues’ tih a ni a. He topic bâkah hian kum 25 chhunga Consumer Right ka lo vahvaihpui ve ka experience te chu ka sawi a. Hun tâwp lamah zawhna leh chhanna hun hman a ni a. Tluang tak leh tha taka kan tling tla thei kha ka lawm hle a ni.
He Consumer Awareness Programme buaipuitu leh khaipa ber Pi Lalsangliani inpekna a ropui ka ti khawp mai. Ani, Pi Sangi hian hneh takin he Programme hi a kaihruai a. Boruak pawh a hnehin a tui chilh bawk a, chhimtute pawh khan hlawk thlak an tih ve ngei ka ring a ni.
Tun hnaia ka lehkhabu ziah ‘Consumer-te Zalenna’ pawh chu Pi Sangi hi copy khat ka pe ve ngawt a. Lo chhiarin lo hlawk pui ve se, ka ti khawp mai.
Sawi leh sawi hnu kei ve hi Consumer Right lipuiah ka inchiah zawr hnûp ringawt ta mai a. Complaint lah chu a lo lut ve reng bawk a. Ka sangawi zawnpui Pu C. Rohnuna leh thawhpui thiante nen hian kan thawhhona a tha bawk a,kan inching fel ve zel chu a ni a. A lawmawm hle a ni. Mipui chanvo humhalhna leh dikna venhim hi ka chaw tui ber a la ni reng dawn a ni.
Thangkurate thu leh hla ang deuhvin insawi theihna pawh ni lovin consumer article hi kum 25 chhung chu ka lo ziak ve ta reng mai a. Tunah phei chuan khel lovin thawhtanni apiangin Zozam Times-ah hian phek thumna ka chang a. Kum 5 liam zet zawt bahlah lovin ka ti thei ta zel a. Ka lawm hle a ni. Kum 25 chhungin Consumer Bu 7 zet ka puitlin thei a. Kan hmalâkna fahrah tê tê ka han ngaihtuah hian ka lawm veng veng ringawt mai zu nia. Ka chhungten min dal lova, Pathianin a zahngaihna ângchhungah min hung a, chuvangin hetiang thu tha consumer-te chanpual hi ka ziak ta thin a ni a.Tu te emaw tan ninawm ni thei mahse,za nufa zet tan erawh malsawmna a nih ka beisei. Khawi zu aiin a thlum zawk ngei ang.
Consumer Right buaipui hi politics dik a ni a, MLA nihna kawng erawh a ni si lo. Mahse, consumer-te thawhsaktu nih hi a Pathian thu êm êm a ni. Kan thianpa Rev. J.C Vanlalluaia’n a ti a. Hei hi kei pawhin ka pawm zawng tak a ni.
Zau zawk leh nasa zawka consumer-te tana ka inhman theih nan Centre For Consumer Education tih chu kan din a. He Centre hian muang marin hma kan la zel dawn a. Corruption kan do ang, consumer-te ti hrehawmtu chu kan do zel dawn a ni.
- Join Centre For Consumer Education: Republic Mual Vengchung.
Contact number – - Hnema- 9862288182/9402321590
- Hnuna- 9862406215
- Dr Maria- 8257040390