Inrinni zan khan Indian I League 2023-24-ah champion thar an awm ta a, champion thar chu Mohamedan SC an ni. Champion tura point khat chiah mamawh tawh Mohamedan hian SSA Stadium-a an khingpui Shillong Lajong chu 2-1 in an hneh a, ISL a kaisang turin an champion.
Champion thar ni tura chak mamawh Mohamedan Sporting hian an len luhna mualah bul an tan tha viau a, goal an thun hma hle. Inkhel tan atanga minute khat chhung lekin Alexis Gómez chuan hmahruaina goal a thun a, champion an hnaih nghal kuarh. Hma takah goal chhuah bawk mah se Lajong in an mikhualte hi awlsam taka chak tir an tum bik lo. Minute 15-na lekah penalty an hmu. He penalty hi Douglas Rosa Tardin chuan hatsatna tawk lovin a pet goal a, an si phurh a sut. Tardin goal thun hnu hian goal dang a luh belh mai thei lova, 1-1 a inhnehtawk chungin chawlhlawk an hmang.
Chawlhlawk hnu lamah Mohamedan an khel tha chhunzawm a, Eugene Kozlov chuan minute 62-naah hma an hruai nawn lehna goal a thun. Kozlov goal thun hi hun tawp thlengin an venghim a, Mimualah hnehna hlu tak changin I League champion thar an ni ta a ni.
Kolkata club lian Mohamedan SC hi season kal mekah an chetha tluang hle. Khelh 23 an hmachhawn tawhah vawi 15 an chak a, draw vawi sarih an nei bawk a, vawi khat chiah an tlawm. Khelh hnih khelh hmabak la nei chungin point 54 an hmu a, an hnuai chiaha awm mek Sreenidi Deccan tan lehpelh theih an ni tawh lova, champion thar an ni ta a ni. I League champion thar Mohamedan SC-ah hian Mizo player Adinga, Zuidika, Samuela, Biakhlua, Remsanga leh David-a te an awm.
I League champion te ISL-ah an kaisan zel tawh vangin Mohamedan SC hian season tharah ISL an khel tawh dawn. ISL-ah hian Kolkata club lian pahnih; Mohun Bagan leh East Bengal te an awm mek a. Anni team hnihte hi I League lamah an tlahniam dawn lo tih a chiang ve ve tawh bawk a. ISL season tharah Kolkata club pathum an awm dawn ta a ni.