- Remruatpuii Pa (CCL); Ph : 84140 15134
An hming kan hre lo; nimahsela, an hmél kan hria. An hming kan hre lo; nimahsela, an thil tih kan hria.
April ni 6, 2024 khán Siaha lamah kan chhúngkuain Scooty-in lángin kan kal a. Kan fanu neih chhun lah kum khat leh thlà nga chauh a ni. Zíng dár 7:00-ah Lawngtlai aṭanga chhuakin Tuipui Ferry kawng lamah kan kal a, Tuipui Ferry aṭanga rei lo tê kan tlàn hnuah ‘nau puak puan’ kan tibó palh hlauh mai a, naute phur kan nih avàngin kan hnunga motor tam takin min lehpěl a, thui fé kan tlàn hnu-ah ‘nau puak puan’ kan tibó tih hre chhuakin kan rilru a hah hman hle. Tichuan, kan kal zèl a, WELCOME to SIAHA tih intàrna signboard/Banner-ah kan thil tihbò ‘nau puak puan (rawng hring)’ chu min lo bàn/dahsak a. A dahtu kan hre lo; nimahsela, an thil ṭha tih kan hria a. Kan làwm a, an chungah làwm thu kan sawi mawlh mawlh a ni.
Tichuan, rei lo tê kan tlàn leh hnuah Siaha TLÁNGKÂWN tlàn thlengin, College kan kal chhúng zawnga min chàwmtu ka ute (hming thup) inah kan thleng a. Vànduaithlák taka vànduaina tâwk an awm avàngin duh angin kan inkàwm tam hman lo va. Hun a liam zêl a, tlai dár 3:50-ah Lawngtlai lam panin kan kîr/haw leh a. Lam hla lo tak mah ni se, Tuipui Ferry lama pènna kawng péng kan hmuh hmaih hlauh mai a (sawi zahthlák si, sawi loh theih ni si lo), thui tak kan tlàn pelh hnu-ah Lawngtlai lam aṭanga Siaha lam pana Burgman Scooty-a chhúngkuaa kal, fa pakhat nei (kan hmuh dàn) te tâwkin, anni hnénah chuan, “Tuipui Ferry pènna kan hmuh hmaih hlauh mai a, tlàn tlang ila Lawngtlai thleng tùrin kal thui a ngai viau em?” tìin kawng chin kan han zâwt a. Anni chuan, “Dárkár hnih chuang lái kal a ngai ang, lêt leh ula in thleng hma zâwk ang a, min lo zui ula a pènna kan lo hrilh ang che u,” tìin kan inzui a.
Khua a thim tawh hle a, an tlân chakin kan um pha lo hle a, rei tak kan tlàn hnuah kan pènna hmun tùrah min lo nghâk reng chu nìin, mi rin tlák an nihzia kan hre chiang kher mai! Kan bò thui êm avàngin min khawngaih a, kan naute sin tùr shawl te min pèin, petrol man tùr pawisa te thlengin min pè a. Kan hmanhmawh luatah an phone number dìlna cháng pawh kan hre lo va, ṭawngkáin làwm thu sawiin kan han inthlah a. An chungah làwm thu kan sawi mawlh mawlh a ni.
An hming kan hre lo; nimahsela, Zo hnahtlák kan unau Mara fate, Siaha khaw mîte an ni tih erawh chiang takin kan hria. Siaha mipuite u, Síamtu [Pathian] malsàwmna dawng tlák in ni. Malsàwmin awm zêl rawh u.