Aizawl: Lok Sabha MP inthlan lo awm tura Indian National Congress (INC) candidate Lalbiakzama chuan thlan tlin a nih chuan Hindutva buaipui bera neitu, Kristian Missionary ten hnawk an tih em em BJP te do turin theihtawp a chhuah dawn tih a sawi.
Thawhtanni khan MP, Lok Sabha inthlan lo awm tura INC candidate Lalbiakzama chuan Champhai tlangdung tlawhin campaign a nei a. Hun hrang hrangah a thusawinaah Lalbiakzama chuan, kum 2014 atanga India ramah BJP ten sorkarna an chan atang khan khawvel mit hmuhah India hi a tlahniam chak hle tih sawiin, “Tun hnaia tehna hrang hrang an siamah pawh a tla hniam chak hle a ni. Politics-a an khingpuite man khawmin jail-a an tantirte hian khawvel a barakhaih a. Heng thil avang hian BJP nilo te an tanrual that phah ve thung a. India bloc a tel lo party te pawh India bloc ah an rawn tel phah mek a. BJP paih an duhna a lian hle a ni,” a ti.
Lalbiakzama chuan BJP chakna ber chu a phena RSS, Bajrang Dal leh VHP te an nih thu sawiin, “BJP sorkar hian RSS, Bajrang Dal leh VHP te thu thua kalin tunah hian Kristian leh sakhaw tenau te tan a hnawk thei ang berin an che a ni,” tiin, thlan tlin a nih chuan Hindutva buaipui bera neitu, Kristian Missionary ten hnawk an tih em em BJP te do tur theihtawp ka chhuah dawn tih a sawi.
INC candidate hian MNF lam chuan an thutna tur an tichiang tawh a, BJP lama an thut tur thu an sawi a. ZPM ten vawiin ni thlengin an thutna tur lam an la sawi chiang duh lo tih sawiin, “Sawi chian duh lohna chhan an nei a ni. Nimahsela, Zoram mipuiten central lama ZPM thawhpui tura rin an nei thup a, an ring sualin ka ring lo. An duhna lamah chuan kal rawh se. central lamah duhthlan tur pahnih chiah a awm. Pakhat chu Kristiante tana hnawksak taka che thin BJP Party an ni a. Pakhat leh chu Kristiante thlavang hauh thin Congress Party a ni,” tiin, Congress lamah kal an tum loh chuan an kalna tur lam hi a chiang thawkhat viaua a hriat thu a sawi.
MPCC President Lal Thanzara pawhin thusawiin, Mizorama MP candidate zingah engtikawng zawng maha BJP sum hmang lo tur, BJP in an control theih loh tur chu INC candidate, Lalbiakzama chauh a nih thu a sawi. Mizo mipuiten BJP control theih party lamah nge BJP control theih loh party lamah vote an thlak dawn tih ngun taka ngaihtuah a ngai tih a sawi.